آرمی چیف جنرل عاصم منیر پاکستان پر کوئی آنچ نہیں آنے دیں گے: پرویز الٰہی

لاہور: (ویب ڈیسک) وزیراعلیٰ پنجاب چودھری پرویز الٰہی نے کہا ہے کہ جنرل (ر) قمر جاوید باجوہ کا دور لوگوں کے دلوں میں بھی یاد رہے گا، اللہ تعالیٰ کی مدد سے انشاء اللہ نئے آرمی چیف سید عاصم منیر پاکستان پر کوئی آنچ نہیں آنے دیں گے۔
وزیراعلیٰ پنجاب چودھری پرویزالٰہی نے اپنے اہم ویڈیو پیغام میں کہا کہ سابق آرمی چیف قمر جاوید باجوہ کا پریڈ تاریخ میں بھی یاد رکھاجائے گا، آپریشن ردالفساد میں سابق آرمی چیف قمر جاوید باجوہ کے شاندار کردار کی دنیا معترف ہے، ملک سے دہشت گردی کے خاتمے کا کریڈٹ قمر جاوید باجوہ کو جاتا ہے۔
انہوں نے مزید کہا کہ الحمد للہ آج خیبرپختونخوا سمیت تمام علاقوں میں امن ہے اور لوگ پرسکون ہیں، جب زلزلہ آیا تو اس وقت بھی سابق آرمی چیف قمر جاوید باجوہ کی قیادت میں پاک فوج نے بہت کام کیا، سیلاب میں بھی فوج پنجاب کے متاثرہ علاقوں سمیت ہر جگہ بروقت پہنچی۔
چودھری پرویز الٰہی نے کہا کہ سندھ میں سیلاب کے دوران پاک فوج کے علاوہ کسی نے کام نہیں کیا، خیبر پختونخوا میں بدترین سیلاب آیا اور قمر جاوید باجوہ خود وہاں پہنچے، جنرل (ر) قمر جاوید باجوہ کی سماجی و دینی خدمات بے شمار ہیں، سعودی عرب نے دنیا کی سب بڑی تبلیغی جماعت پر غلط فہمی کی بنا پر پابندی لگا دی تو سابق آرمی چیف قمر جاوید باجوہ نے پابندی ہٹوانے میں اہم کردار ادا کیا، تبلغی جماعت کے اجتماعات میں قمر جاوید باجوہ کی درازی عمر اور پالیسیوں کے تسلسل کیلئے سب سے زیادہ دعائیں کی گئیں۔
وزیراعلیٰ پنجاب کا کہنا تھا کہ قمر جاوید باجوہ کا کردار دین کیلئے بھی اچھا ہے، ملک کیلئے بھی اچھا ہے اور آئندہ آنے والی نسلوں کے لئے بھی اچھا ہے، میں سمجھتا ہوں کہ لوگ آتے جاتے ہیں لیکن ان کے کام ہمیشہ یاد رہتے ہیں، قمر جاوید باجوہ نے ملک کی حفاظت، سلامتی اور بہتری کیلئے جتنے کام کیے وہ رہتی دنیا تک لوگ یاد رکھیں گے۔
انہوں نے کہا کہ میں نئے آرمی چیف سید عاصم منیر کو بھی مبارکباد پیش کرتا ہوں، ہمیں بہتری کی امید ہے کہ جنرل سید عاصم منیر کا بہت تجربہ ہے اور انہوں نے بہت کام کیا ہے، مجھے بھی موقع ملا تھا 8، 10 ماہ کام کرنے کا ان کے ساتھ، انشاء اللہ جنرل سید عاصم منیر بہترین سپہ سالار ثابت ہوں گے، ہماری سب کی دعائیں نئے آرمی چیف کے ساتھ ہیں، بھارت یہ نہ سمجھے کہ ہم لاوارث ہوگئے ہیں، یہ کبھی نہیں ہوسکتا، پاک فوج دنیا کا بہترین ادارہ ہے اور پورا ایک نظام موجود ہے۔
اپنے ویڈیو پیغام میں ان کا کہنا تھا کہ دنیا کی سب سے بہترین فوج پاکستان کی فوج ہے، پاک فوج کی ہر جگہ پر نظر ہوتی ہے، خصوصاً فارن پالیسی اور دیگر امور بھی ان کی نظر میں ہوتے ہیں، اللہ تعالیٰ کی مدد سے انشاء اللہ نئے آرمی چیف سید عاصم منیر پاکستان پر کوئی آنچ نہیں آنے دیں گے۔