آسٹریلین لیگ فائنل :گراؤنڈ میں تماشائیوں کا دھاوا، میچ منسوخ

میلبورن: (ویب ڈیسک) میلبورن میں جاری آسٹریلین لیگ (اے لیگ) کے فائنل کے دوران تماشائیوں کے حملے میں کھلاڑی اور ریفری کے زخمی ہونے کے بعد انتظامیہ نے میچ منسوخ کر دیا۔
اے لیگ کے میلبورن سٹی اور میلبورن وکٹری کی ٹیموں کے درمیان کھیلے جانے والے فائنل میچ کے 22 ویں منٹ کے دوران تماشائیوں نے گراؤنڈ میں داخل ہو کر میلبورن سٹی کے گول کیپر ٹام گلوور پر حملہ کر دیا، اس دوران کھلاڑی کا دفاع کرتے ہوئے ریفری ایلکس کنگ بھی چوٹ لگنے سے زخمی ہوئے۔
وکٹوریہ پولیس کے مطابق 150 سے 200 تماشائی گراؤنڈ میں داخل ہوئے اورانہوں نے گلوور اور ریفری پر آگ بجھانے والی دھاتی بالٹی سے حملہ کرکے دونوں کو زخمی کر دیا، آسٹریلین فٹبال لیگ کی جانب سے واقعے کی مکمل تحقیقات کا اعلان کردیا گیا ہے۔
میلبورن سٹی کلب کی جانب سے واقعےکی شدید الفاظ میں مذمت کی گئی ہے ، جبکہ آسٹریلین پروفیشنل لیگ نے بھی مستقبل میں ایسے واقعات کی روک تھام کیلئے فٹبال آسٹریلیا کے ساتھ مل کر کوششیں کرنے کا اعلان کیا ہے۔