مسلم لیگ ن کی سینئر نائب صدر مریم نواز سے قائم مقام برطانوی ہائی کمشنر کی ملاقات

لاہور: (ویب ڈیسک) پاکستان مسلم لیگ (ن) کی سینئر نائب صدر مریم نواز سے قائم مقام برطانوی ہائی کمشنر زوئی وئیر نے ملاقات کی ،ملاقات پارٹی کے مرکزی سیکرٹریٹ، 180 ایچ ماڈل ٹاؤن لاہور میں ہوئی۔ملاقات میں باہمی دلچسپی کے امور پر تبادلہ خیال کیا گیا ،قائم مقام ہائی کمشنر نےپشاور پولیس لائنز مسجد میں دہشت گرد حملے اور قیمتی انسانی جانوں کے ضیاع پر افسوس کا اظہار کیا ۔ زوئی ویئر کا کہنا تھا کہ پاکستان کے عوام سے یکجہتی کرتے ہیں۔
ملاقات میں مریم نواز کا کہنا تھا کہ پشاور واقعہ بڑا سانحہ ہے، ہر دل مغموم ہے،دہشت گردی مشترکہ خطرہ ہے، مشترکہ کوششوں سے ہی خاتمہ ممکن ہوگا۔پاکستان نے دہشت گردی کے خلاف عظیم جانی و معاشی نقصانات اٹھائے ہیں۔دنیا کو پاکستان اور اس کے عوام کی اس مشکل صورتحال میں مدد کرنا ہوگی،اتحادی حکومت نے تباہ کن سیلاب سے متاثرہ 3 کروڑ 30 لاکھ لوگوں کی بھرپور مدد کی،مشکل ترین معاشی حالات کے باوجود وزیراعظم شہباز شریف نے سیلاب متاثرین کو 100 ارب روپے سے زائد مالی امداد فراہم کی۔مریم نواز نے برطانیہ اور اس کے ادارے ڈیفیڈ کی جانب سیلاب متاثرین کی مدد پر شکریہ ادا کیا ۔
ملاقات کے دوران مریم نواز کا کہنا تھا کہ برطانیہ میں مقیم پاکستانی برادری دونوں ممالک کے تعلقات کی مزید مضبوطی میں اہم کردار ادا کر رہے ہیں،پاکستان اور برطانیہ کے درمیان مختلف شعبوں میں دوطرفہ روابط کو مزید فروغ دینے کی ضرورت ہے۔جمہوریت کا تسلسل اور وقت پر انتخابات اہم ہیں جس سے درپیش چیلنجز کا کامیابی سے مقابلہ ممکن ہے۔
قائم مقام ہائی کمشنر نے پارٹی کے سینئر نائب صدر کے عہدے پر تقرری پر مریم نواز کو مبارک بھی دی اور نیک تمناؤں کا اظہار کیا،مریم نواز نے قائم مقام ہائی کمشنر کی آمد اور نیک تمناؤں کے اظہار پر شکریہ ادا کیا۔