دنیا میں نئی فاشسٹ پالیسیوں سے مسلمانوں کو نشانہ بنایا جا رہا ہے، بلاول بھٹو

نیویارک: (ویب ڈیسک) پاکستان پیپلز پارٹی (پی پی پی) کے چیئرمین اور وزیر خارجہ بلاول بھٹو نے کہا ہے کہ دنیا بھر میں نئی فاشسٹ پالیسیوں کے تحت مسلمانوں کو نشانہ بنایا جا رہا ہے۔
اسلاموفوبیا سے نمٹنے کیلئے عالمی دن کی یادگاری تقریب سے خطاب میں وزیرخارجہ بلاول بھٹو زرداری نے کہا کہ اسلاموفوبیا آج کے دورکا ایک اہم مسئلہ ہے، اسلام امن اور رواداری کا دین ہے، اسلاموفوبیا کے مسئلے سے نمٹنے کیلئے سب کو اپنا کردار ادا کرنا چاہیے۔
انہوں نے کہا کہ دہشت گردی کا کسی مذہب سے کوئی تعلق نہیں، اسلام کو بدقسمتی سے دہشت گردی کے ساتھ جوڑا جاتا رہا، دنیا میں منظم طریقے سے مسلمانوں کے خلاف نفرت پھیلائی جا رہی ہے۔
بلاول بھٹو نے کہا کہ مسلمانوں کو مذہب کی وجہ سے نشانہ بنایا جا رہا ہے، کرائسٹ چرچ جیسے واقعات سے پتا چلتا ہے کہ اسلاموفوبیا دنیا میں پھیل رہا ہے، حجاب جیسے معاملات کو سیاست میں لانے کا مقصد اسلام کو نشانہ بنانا ہے۔