اسلام آباد: (ویب ڈیسک) پنجاب پولیس حکام نے زمان پارک میں انسداد تجاوزات آپریشن کے بعد پی ٹی آئی کارکنوں کے ردعمل کے پیش نظر پولیس اہلکاروں کیلئے نئی ہدایات جاری کر دیں۔
ضلعی و ٹریفک پولیس حکام نے اہلکاروں کے لئے جاری پیغام میں کہا کہ مغل پورہ، لال پل اور دھرم پورہ جانے والا سٹاف زمان پارک کا متبادل راستہ اختیار کرے۔
حکام نے کہا کہ باوردی اہلکار زمان پارک کے ارد گرد یا قریب سے مت گزریں، ڈیوٹی پوائنٹس پر جانے یا واپس آنے والے اہلکار روٹ تبدیل کر دیں۔
حکام کا کہنا ہے کہ پی ٹی آئی کارکن اب تک ایلیٹ فورس، پولیس ریسپانس یونٹ کی گاڑیاں تباہ کر چکے ہیں، ڈیوٹی سے واپس جاتے ہوئے پولیس اہلکار کو بھی تشدد کا نشانہ بنایا گیا۔
واضح رہے کہ لاہور میں پی ٹی آئی کارکنان نے پی ایس ایل میچ سے واپس آنے والی پولیس وین پر حملہ کر دیا تھا۔
پی ٹی آئی کارکنان نے پولیس وین پر ڈنڈے برسائے اور شیشے توڑ دیئے، حملے کے دوران پولیس وین کی لائٹیں اور سکرین بھی توڑ دی گئی تھی۔
