دوحا : (ویب ڈیسک) قطر میں ہونے والی لیجنڈز لیگ 2023 کے فائنل میں ایشیا لائنز نے ورلڈ جائنٹس کو شکست دے کر ایونٹ کا ٹائٹل اپنے نام کرلیا۔
قطر کے دارلحکومت دوحا میں لیجنڈز لیگ 2023 کے فائنل میں شاہد آفریدی کی قیادت میں ایشیا لائنز نے ورلڈ جائنٹس کو 7 وکٹوں سے شکست دے کر ایونٹ کا ٹائٹل اپنے نام کیا۔
ویسٹ اینڈ پارک انٹرنیشنل کرکٹ سٹیڈیم میں ہونے والے فائنل میں جائنٹس نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 4 وکٹوں کے نقصان پر 147 رنز بنائے، روس ٹیلر نے 32 رنز بنائے جبکہ جیک کیلس نے 78 رنز کی ناقابل شکست اننگ کھیلی۔
ہدف کے تعاقب میں ایشیا لائنز کے اوپنرز تلکا رتنے دلشان اور اپل تھرنگا کے درمیان 115 رنز کی پارٹنر شپ ہوئی، دلشان نے 58 اور تھرنگا نے 57 رنز بنائے، محمد حفیظ اور مصباح الحق 9 ، 9 رنز پر ناٹ آؤٹ رہے۔
یاد رہے کہ ایونٹ کی فاتح ٹیم ایشیا لائنز کی قیادت پاکستان کرکٹ ٹیم کے سابق کپتان اور سٹار آل راؤنڈر شاہد آفریدی کے سپرد تھی۔
ایشیا لائنز نے لیجنڈز لیگ 2023 کا ٹائٹل اپنے نام کرلیا
