لاہور : بھارتی سکھ پارٹی کی جانب سے گوردوارے کیلئے سنگ مرمر کا تحفہ

لاہور: (ویب ڈیسک) بھارت سے لاکھوں روپے مالیت کا نایاب سنگ مرمر پاکستان لایا گیا ہے جو لاہورمیں گوردوارہ ڈیرہ صاحب کی تزئین وآرائش میں استعمال کیاجائیگا۔
گوردوارہ صاحب کی کارسیوا(تعمیر وتوسیع) کرنیوالی سکھ پارٹی نے یہ پتھر تحفے کے طور پر پاکستان بھیجا ہے، یہ وہی سنگ مرمر ہے جو امرتسر بھارت میں سکھوں کے سب سے مقدس استھان گولڈن ٹمپل میں استعمال کیا گیا ہے۔
سفید سنگ مرمر کے 480 مختلف سائز کے پتھر ہیں جن کو سائز کے مطابق کاٹ کر سکھ مذہب کے رسم ورواج کے مطابق ان پر نقش ونگار بنائے گئے اور گورمکھی میں گورونانک دیو کے اقوال کنندہ کیے گئے ہیں۔
بھارت سے پتھرکے تحفہ ملنے کے بعد امید ہے کہ گوردوارہ ڈیرہ صاحب کی تزئین و آرائش کا کام جو کہ بھارت سے آئے باباگورمیت سنگھ اور دیگر کاریگر کررہے ہیں ، جلد مکمل کرلیا جائے گا ، متروکہ وقف املاک بورڈ اور پاکستان سکھ گوردوارہ پربندھک کمیٹی نے بھی اس میں خطیر رقم خرچ کی ہے۔
دوسری جانب بھارت سے سکھ یاتری پنجاب کے مختلف گوردواروں میں 10 روزہ بیساکھی تہوار کی تقریبات میں شرکت کے لیے اتوار کو لاہور پہنچے ہیں ، وہ آج گردوارہ سچا سودا (فاروق آباد) کے لیے روانہ ہو چکے ہیں جہاں وہ آج ہی سڑک کے ذریعے ننکانہ صاحب واپس آئیں گے۔
11 اپریل کو وہ ننکانہ میں دیگر مقامی گردواروں کا دورہ کریں گے اور 12 اپریل کو حسن ابدال میں گردوارہ پنجہ صاحب کے لیے سڑک کے ذریعے روانہ ہوں گے۔
مرکزی تقریب 14 اپریل کو پنجہ صاحب میں ہوگی جہاں یاتری ’بھوگ اکھنڈ پاٹھ صاحب اور نگر کیرتن‘ 324 واں خالصہ جنم دن منانے کے لیے مرکزی تقریب میں شرکت کریں گے ، اس کے بعد وہ لاہور سے گردوارہ ڈیرہ صاحب کے لیے روانہ ہوں گے جہاں وہ اگلے ایک دن قیام کریں گے۔
16 اپریل کو وہ ایمن آباد میں گردوارہ روڑو صاحب کے لیے روانہ ہوں گے، اسی روز وہ نارووال کرتارپور میں گردوارہ دربار صاحب بھی جائیں گے،جہاں رات کا قیام بھی کریں گے۔
17 اپریل کو سکھ یاتری دوبارہ لاہور کے گردوارہ ڈیرہ صاحب کے لیے روانہ ہوں گے اور وہاں رات گزارنے کے بعد اگلے روز (18 اپریل) کو واہگہ کے راستے بھارت واپس چلے جائیں گے۔