متحدہ عرب امارات سفارتخانہ کی جانب سے لائٹ ہاؤ س میں افطار کا اہتمام

اسلام آباد: (ویب ڈیسک) پاکستان میں متحدہ عرب امارات کے سفیر عزت مآب حماد عبید ابراہیم سالم الزابی نے بیکن ہاؤس گروپ کی نادار بچوں کیلئے بنائی گئی غیر منافع بخش تنظیم لائٹ ہاؤس کے بچوں اور اسٹاف کیلئے افطار کا اہتما م کیا۔
لائٹ ہاؤس یتیم بچوں کیلئے بورڈنگ اور تعلیمی سیٹ اپ ہے،جو بلا امتیاز معیاری تعلیم،زندگی کیلئے ضروری مہارتیں،اچھی صحت اور دیگر معاونت یقینی بناتا ہے۔تنظیم کا مقصد یتیم بچوں کیلئے ایک محفوظ اور پیار بھرے گھر کی فراہمی اورانہیں خود مختار اور با اعتمادشخصیت بنانے کے حوالے سے پروان چڑھانا ہے۔
لائٹ ہاؤس کی بانی و ایگزیکٹیو ڈائریکٹر آمنہ وٹو کا اس موقع پر کہنا تھا کہ ”میں اس تقریب کے انعقاد پر عزت مآب حماد عبید ابراہیم سالم الزابی کی شکر گزار ہوں،ایسے اجتماعات ہم میں سے بہت سے لوگوں کیلئے خود تشخیصی اور معاشرے کو ہر ممکن طریقہ سے کچھ واپس کرنے کا بہترین موقع ہیں،گزشتہ چند برسوں کے دوران ہم نے معاشرے کے مستحق افراد کی ترقی کیلئے انتھک محنت کی ہے اور ہم اس ضمن میں مثال قائم کرکے اس نیک کام کی قیادت کرتے رہیں گے۔“