پیرس : ( ویب ڈیسک ) فرانس کے دارالحکومت پیرس میں ایک بڑے دھماکے کے نتیجے میں 37 افراد زخمی ہوگئے ۔ غیر ملکی خبر رساں ادارے کے مطابق وسطی پیرس میں ایک زور دار دھماکہ ہوا جس کے بعد وہاں موجود متعدد عمارتوں میں آگ لگ گئی جبکہ دھماکے کے نتیجے میں 37 افراد زخمی ہوئے جن میں سے 4 کی حالت تشویشناک ہے۔ عینی شاہدین کے مطابق دھماکے سے قبل گیس کی شدید بو آ رہی تھی۔ پیرس کے پراسیکیوٹر نے جائے وقوعہ پر پہنچنے کے بعد کہا کہ کیمرے کی فوٹیج کی ابتدائی جانچ سے پتہ چلتا ہے کہ دھماکہ عمارت کے اندر ہوا۔ پیرس پولیس کا کہنا تھا کہ ابتدائی اطلاعات کے مطابق دھماکا گیس لیکج سے ہوا ہے، دھماکے کے بعد ایک عمارت کا اگلا حصہ زمین بوس ہوگیا اور عمارت کو ابتدائی طور پر آگ نے لپیٹ میں لے لیا لیکن بعد میں آگ پر قابو پالیا گیا۔ جس علاقے میں دھماکا ہوا وہ پیرس کے بائیں کنارے کے علاقے میں لاطینی کوارٹر سے جنوب کی طرف ہے جو سیاحوں میں مقبول ہے اور طلباء کی آبادی کے لیے جانا جاتا ہے۔
