بیجنگ : (ویب ڈیسک) چین کے شمال مغربی علاقے ننگزیا میں ایک ریسٹورنٹ میں سلنڈر دھماکے سے 31 افراد ہلاک ہو گئے۔
سرکاری خبر رساں ایجنسی ژنہوا کے مطابق ننگزیا کے دارالحکومت ینچوان میں ایک ریسٹورنٹ کے اندر مائع پٹرولیم گیس کے سلنڈر پھٹنے سے دھماکہ ہوا جس کے نتیجے میں 31 افراد ہلاک ہو گئے۔
ژنہوا کے مطابق دھماکے کے نتیجے میں سات افراد شدید زخمی بھی ہوئے جنہیں طبی امداد کے لئے ہسپتال منتقل کر دیا گیا ہے۔
رپورٹس کے مطابق امدادی کارروائیاں تاحال جاری ہیں اور ٹریفک کی آمد و رفت کو عارضی طور پر معطل کر دیا گیا ہے۔
چین کے سرکاری ٹیلی ویژن کی خبر کے مطابق صدر شی جن پنگ نے حکام کو زخمیوں کے علاج کے لیے ہر ممکن کوشش کرنے کا حکم جاری کرتے ہوئے کہا کہ اہم صنعتوں اور شعبوں میں حفاظتی نگرانی کو مضبوط بنایا جانا چاہیے۔
رپورٹس کے مطابق چین میں کئی سالوں سے حفاظت کو بہتر بنانے کی کوششوں کے باوجود گیس اور کیمیائی دھماکوں کی وجہ سے حادثات کوئی غیر معمولی بات نہیں ہے۔
2015 میں شمالی بندرگاہی شہر تیانجن میں سلسلہ وار دھماکوں میں 173 افراد ہلاک ہوئے تھے۔
