لاہور ہائیکورٹ: چیئرمین پی سی بی کا انتخاب رکوانے کیلئے درخواست سماعت کیلئے مقرر

لاہور: (ویب ڈیسک) لاہور ہائیکورٹ نے پاکستان کرکٹ بورڈ (پی سی بی) کے چیئرمین کا انتخاب رکوانے کیلئے دائر درخواست سماعت کیلئے مقرر کر دی۔
لاہور ہائیکورٹ میں شہری شیخ اقبال کی جانب سے دائر درخواست میں پی سی بی اور وفاقی حکومت سمیت دیگر کو فریق بنایا گیا ہے۔
درخواست گزار نے مؤقف اختیار کیا ہے کہ چیئرمین پی سی بی کے انتخاب کیلئے الیکشن 27 جون کو ہونا ہے، الیکشن کروانے کیلئے بورڈ آف گورنرز کی تشکیل پی سی بی آئین کے خلاف ہے۔
درخواست میں استدعا کی گئی ہے کہ عدالت عالیہ پی سی بی چیئرمین کا الیکشن روکنے کا حکم دے، لاہور ہائیکورٹ کے جسٹس ساجد محمود سیٹھی 26 جون بروز پیر کو درخواست پر سماعت کریں گے ۔
دوسری جانب پی سی بی ترجمان کا کہنا ہے کہ بورڈ آف گورنرز کا خصوصی اجلاس منگل کی دوپہر 2 بجے نیشنل کرکٹ اکیڈمی میں ہوگا جس میں اراکین بورڈ آف گورنرز میں سے چیئرمین کا انتخاب کریں گے۔
واضح رہے کہ نجم سیٹھی کے خود کو چیئرمین کے عہدے سے دستبردار کرنے کے بعد پیٹرن ان چیف پی سی بی وزیراعظم شہباز شریف کی جانب سے نامزد ذکاء اشرف چیئرمین شپ کیلئے مضبوط امیدوار ہیں۔