شوبز انڈسٹری کی متعدد معروف شخصیات بھی صحت سے متعلق مسائل میں گھِری رہتی ہیں جن سے متعلق کوئی سوشل میڈیا یا اپنے مداحوں کے ساتھ کسی انٹرویو کے ذریعے شیئر کر لیتا ہے تو کچھ سلیبریٹیز اپنے مسائل کو چھپا لیتے ہیں۔
پاکستان شوبز انڈسٹری میں کچھ فنکار ایسے بھی جنہیں موذی، جان لیوا بیماریاں لاحق ہوچکی ہیں، کچھ نے ان سے چھٹکارہ حاصل کر لیا ہے تو کچھ شخصیات صحت سے متعلق اس مشکل صورتحال میں تاحال گھری ہوئی ہیں۔
اس رپورٹ میں معروف شخصیات اور اُنہیں درپیش بیماریوں سے متعلق معلومات درج ذیل ہیں۔
بدترین ذہنی دباؤ کا شکار فنکار
میڈیا رپورٹس کے مطابق اداکار محسن حیدر عباس، اداکارہ صحیفہ جبار خٹک، گلوکارہ مومنہ مستحسن اور گلوکار نعمان جاوید شدید ذہنی دباؤ کا شکار رہ چکے ہیں۔
یہ وہ فنکار ہیں جنہوں نے اپنے مسائل کو مداحوں کے ساتھ شیئر کیا جبکہ کچھ فنکار اپنے صحت سے متعلق مسائل کو سوشل میڈیا پر لاتے ہوئے بے حد کتراتے ہیں۔
فلم و ٹی وی انڈسٹری کے اداکار فواد خان نے ایک انٹرویو کے دوران انکشاف کیا تھا کہ اُنہیں اسکول کے زمانے سے ذیابطیس کا مرض لاحق ہے۔
انہوں نے ذیابطیس سے جنگ لڑنے اور اس مرض کو مات دینے سے متعلق اپنا تجربہ بھی شیئر کیا تھا۔
زیبا بختیار: ٹائپ 2 ڈائیبٹیز
اداکارہ زیبا بختیار کو بھی ذیابطیس کا مرض لاحق ہے۔
انہوں نے اپنے سابق شوہر عدنان سمیع خان سے طلاق اور پھر بیٹے کی کسٹڈی کے حوالے سے گفتگو کرتے ہوئے حال ہی میں بتایا ہے کہ 18 ماہ تک بیٹے کی کفالت حاصل کرنے کے لیے قانونی جنگ لڑی اس دوران شدید ڈپریشن کا شکار ہوئی جو بعدازاں ذیابطیس میں تبدیل ہوگیا۔
انہوں نے بتایا کہ صرف 25 برس کی عمر میں ذیابطیس جیسے مرض میں مبتلا ہوئی جبکہ اہل خانہ میں سے کوئی بھی اس مرض کا شکار نہیں۔
اسما عباس: کینسر
اداکارہ اسما عباس کو چھاتی کا کینسر لاحق ہوا تھا، اس دوران اداکارہ کئی پروجیکٹس میں مصروف تھیں، انہوں نے اداکاری کے ساتھ ساتھ اپنا علاج بھی کروایا اور اس جان لیوا مرض کو مات دی۔
آغا علی: چنبل (اسکن ڈیزیز) میں مبتلا ہیں
ورسٹائل اداکار آغا علی نے اپنے ایک حالیہ انٹرویو کے دوران خود کو لا حق، لاعلاج بیماری سے متعلق انکشاف کیا تھا۔
آغا علی کا انٹرویو کے دوران اپنی بیماری سے متعلق انکشاف کرتے ہوئے کہنا تھا کہ وہ گزشتہ 14 برسوں سے چنبل (psoriasis) نامی جِلدی بیماری کا شکار ہیں اور اُنہیں یہ بیماری کیریئر کے آغاز میں لگی تھی، اس بیماری نے اُن پر طاقتور حملہ کیا تھا، آغاز ہی میں اُن کے جسم پر سیکڑوں کی تعداد میں زخم بن گئے تھے۔
آغا علی کا اپنی اس بیماری سے متعلق مزید بات کرتے ہوئے کہنا تھا کہ چنبل کو ادویات کے ذریعے کنٹرول کیا جاسکتا ہے لیکن دنیا میں ابھی تک اس کا مکمل طور پر علاج سامنے نہیں آیا ہے۔
اداکارہ ایمان علی: ’ملٹی پل اسکلیروسز ‘
معروف اداکارہ ایمان علی جان لیوا بیماری ’ملٹی پل اسکلیروسز‘ میں مبتلا ہیں۔
ایمان علی نے ایک انٹرویو کے دوران اپنی بیماری اور کیرئیر میں درپیش آنے والے مسائل اور اس کے ساتھ رہتے ہوئے زندگی کی جدوجہد سے آگاہ کیا تھا۔
ایمان علی کا کہنا تھا کہ 2006ء میں وہ اپنے کیریئر کے عروج پر تھیں، ہر میگزین کے سرورق پر اُن کی تصویر ہوتی تھی ایسے میں اُن میں ’ملٹی پل اسکلیروسز ‘ جیسی جان لیوا بیماری کی تشخیص ہوئی۔
ایمان علی نے بتایا کہ اُس وقت یہ میری زندگی کا سب سے بڑا چیلنج بن گیا تھا، انہوں نے کہا کہ لوگوں کو اس بارے میں پتہ ہی نہیں ہے کہ ’ملٹی پل اسکلیروسز‘ میں ہوتا کیا ہے، اس کے زندگی گزارنا کتنا اذیت ناک ہے۔
نادیہ جمیل؛ کینسر
اداکارہ نادیہ جمیل میں 2020ء میں موزی مرض کینسر کی تخشیص ہوئی تھی۔
نادیہ جمیل بریسٹ کینسر (چھاتی کا سرطان) کا شکار وئی تھیں، اداکارہ نے سلسلہ وار ٹوئٹس میں بتایا تھا کہ اُن میں کینسر کی تشخیص ہوئی ہے اور 4 روز سے وہ اس بیماری کا علاج کروا رہی ہیں۔
اذان سمیع خان: Genetic predisposition
اذان سمیع خان ’جینیٹک پری ڈِسپوزیشن‘ نامی بیماری میں مبتلا ہیں۔
یہ ایک جینیاتی بیماری ہے جس میں ایک یا ایک سے زیادہ جینیاتی تغیرات یا خاندانی تاریخ میں کسی بیماری کی موجودگی کی بنیاد پر کسی خاص بیماری کے پیدا ہونے کے امکانات میں اضافہ ہوجاتا ہے۔
اس بیماری کے بڑھتے ہوئے خطرے کے سبب فرد والد یا والدہ کی جانب سے ایک جینیاتی بیماری لے سکتا ہے، جینیاتی بیماری ہونے کا مطلب یہ نہیں ہے کہ ایک فرد بیماری پیدا کرے گا بلکہ وہ بیماری کو عام افراد کے مقابلے میں جَلدی پکڑ لیتا ہے۔
