لکی مروت: خیبرپختونخوا کے ضلع لکی مروت میں سیکیورٹی فورسز اور دہشت گردوں کے درمیان فائرنگ کے تبادلے کے دوران پاک فوج کے دور اہلکار شہید ہوگئے جبکہ دو دہشت گرد بھی مارے گئے۔
پاک فوج کے شعبہ تعلقات عامہ (آئی ایس پی آر) سے جاری بیان کے مطابق لکی مروت میں سیکیورٹی فورسز کا دہشت گردوں سے فائرنگ کا تبادلہ ہوا ، جس کے نتیجے میں دو دہشت گردوں کو جہنم واصل کر دیا گیا، جن کی شناخت آفتاب ملنگ اورمسعود شاہ کے نام سے ہوئی۔
آئی ایس پی آر نے بتایا کہ دہشت گرد سیکورٹی فورسز کے خلاف کارروائیوں اورمعصوم شہریوں کی ٹارگٹ کلنگ میں بھی ملوث تھے اور ان کے قبضے سے اسلحہ، گولہ بارود اور دھماکا خیز مواد بھی برآمد ہوا۔
دہشت گردوں سے فائرنگ کے تبادلے کے دوران پاک فوج کے دو بہادر سپاہی محمد افضل اور ابرار حسین شہید ہوگئے جبکہ علاقے میں دہشت گردوں کے خاتمے کے لیے کارروائی کی جارہی ہے۔
آئی ایس پی آر نے بتایا کہ پاکستان کی مسلح افواج ملک سے دہشت گردی کی لعنت ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
