عام انتخابات 2024 کے انعقاد میں گیارہ دن باقی رہ گئے ہیں، جس کے باعث ملک میں سیاسی جوش و خروش میں اضافہ ہوگیا ہے۔ انتخابی مہم تیز ہوچکی ہے، شہر شہر جلسے، ریلیاں اور کارنر میٹنگز جاری ہیں، اسی گہما گہمی کے چلتے مسلم لیگ (ن) آج سیالکوٹ اور ڈسکہ میں جلسہ کرے گی، جن سے نواز شریف خطاب کریں گے، جبکہ پیپلز پارٹی آج راولپنڈی میں پاور شو کرے گی، جس سے بلاول بھٹو زرداری خطاب کریں گے۔
انتخابات قریب آتے ہی ملک میں سیاسی پارہ بھی ہائی ہوچکا ہے، پیپلز پارٹی اور ن لیگ آمنے سامنے آگئے ہیں، بلاول بھٹو نے ٹوئٹر پر شہباز شریف کو بھرپور جواب دیا اور لیگی قائد کو مناظرے کی پھر پیشکش کرتے ہوئے کہا کہ نواز شریف مجھ سے خیرپور گمبٹ میں مناظرہ کرلیں، گمبٹ کا اسپتال پنجاب کے اسپتالوں سے بہتر ہے، کراچی کے این آئی سی وی ڈی کے باہر مباحثہ کرلیں۔
بلاول نے کہا کہ میاں صاحب راہ فرار اختیار نہ کریں، براہ کرم بتائیں کہ کس شہر میں مباحثہ کرنا ہے؟
دوسری جانب گزشتہ روز ”پاکستان کو نواز دو“ کے نام سے ن لیگ کا انتخابی منشور بھی پیش کیا گیا، جس میں کہا گیا ہے کہ پارلیمنٹ کی بالادستی کو یقینی بنایا جائے گا، آرٹیکل باسٹھ اور تریسٹھ کو اصل حالت میں بحال کیا جائے گا، چھوٹے کسانوں کو سود سے پاک قرض دیا جائے گا، کم آمدن والے افراد کے لیے علاج کی مفت سہولت ہوگی۔
منشور میں ایک کروڑ سے زائد نوکریوں کی فراہمی کا وعدہ کیا گیا ہے، ہر صوبے میں کینسر اسپتال کی تعمیر منشور کا حصہ ہے، تعلیم کے لیے بجٹ بڑھایا جائے گا، یونیورسل ہیلتھ کوریج اور انشورنس بھی منشور میں شامل ہے۔
پاکستان پیپلز پارٹی نے بھی ”چنو نئی سوچ کو“ کے عنوان سے انتخابی منشور جاری کیا جسے معاشی معاہدہ قرار دیا۔
اس منشور کے مطابق اجرت پر کام کرنے والوں کی حقیقی آمدن کو دوگنا کیا جائے گا، بے زمینوں کو مکان دیے جائیں گے، بھوک مٹاؤ پروگرام شروع ہوگا، ہاری کسان، مزدور اور یوتھ کارڈ جاری کیا جائے گا۔
