سعودی حکومت نے ہنرمند تارکینِ وطن کے زیرِ کفالت افراد کے لیے ویزا فیس پر نظرِثانی کا عندیہ دیا ہے۔
سعودی کابینہ کے ایک سینیر رکن نے بتایا ہے کہ سعودی عرب میں مقیم ہنرمند غیر ملکیوں کو حکومت زیادہ سے زیادہ فوائد پہنچانا چاہتی ہے۔ اس مقصد کے حصول کے لیے ان کے زیرِ کفالت افراد کے لیے ویزا فیس پر نظرِثانی کی جارہی ہے تاکہ ان کے لیے بہتری کا امکان پیدا ہو۔
2020 سے سعودی عرب میں کام کرنے والے غیر ملکی زیرِ کفالت افراد میں سے سے ہر ایک کے لیے 400 ریال فیس ادا کرنے کے پابند ہیں۔
سوکریٹس پوڈ کاسٹ سے ایک انٹرویو میں وزیرِ خزانہ محمد الجدان نے کہا کہ حکومت غیر ملکیوں کے زیرِ کفالت افراد کے حوالے سے فیس کے ڈھانچے پر غور کر رہی ہے۔ اس کا مقصد زیادہ سے زیادہ ہنرمند افراد کو سعودی عرب آنے کی تحریک دینا ہے۔
محمد الجدان نے بتایا کہ غیر ملکیوں کے زیرِ کفالت افراد کے لیے فیس 2017 تک 100 ریال تھی۔ اس کے بعد یہ سال بہ سال بڑھتی رہی ہے۔ اس وقت سعودی عرب میں کم وبیش 20 لاکھ غیر ملکی ریاست کی طرف سے اشیا و خدمات پر دی جانے والی رعایت سے مستفید ہو رہے ہیں۔
سعودی حکومت نے حال ہی میں چند اہم بنیادی اشیا پر رعایت ختم کردی ہے۔ سٹیزنز اکاؤنٹ پروگرام صرف ان کی مدد کر رہا ہے جنہیں مدد کی زیادہ ضرورت ہے۔
سعودی وزیرِ خزانہ کا کہنا ہے کہ اگر غیر ملکیوں کے ذریعے آمدنی بڑھ رہی ہے تو فیس کے ڈھانچے پر نظرِثانی بھی ناگزیر ہے۔ حکومت چاہتی ہے کہ غیر ملکی محنت کشوں کو کام کا بہترین ماحول ملے اور وہ اپنے اور زیرِکفالت افراد کے لیے نمایاں سماجی تحفظ کے حامل ہوں۔ حکومت ان کی کارکردگی کا معیار بلند کرنے کے لیے کوشاں ہے۔ اس کے نتیجے میں مجموعی طور پر پوری معیشت کو فائدہ پہنچے گا۔
ویڈیو ایڈیڈ ٹیکس کے حوالے سے محمد الجدان نے کہا کہ اس معاملے میں حکومت علاقائی ریاستوں کی پالیسیوں سے ہم آہنگ پالیسیاں اپنانا چاہتی ہے۔ ویلیو ایڈیڈ ٹیکس میں اضافے کا مقصد ضرورت مند افراد کی زیادہ سے زیادہ امداد یقینی بنانا ہے۔ ان کا کہنا ہے کہ ویلیو کی شرح (15 فیصد) میں فوری کمی کی کوئی تجویز زیرِغور نہیں۔
