دوسری بار صدر بننے والے ڈونلڈ ٹرمپ نے ایلون مسک کو ابھرتا ستارہ قرار دے دیا

حالیہ امریکی انتخابات میں دوسری بار صدر منتخب ہونے کے بعد ڈونلڈ ٹرمپ نے پارٹی ہیڈکوارٹر میں تقریر کے دوران ارب پتی ایلون مسک کی تعریف کے پُل باندھے۔

اپنے خطاب میں ٹرمپ نے ایلون مسک کا شکریہ ادا کرتے ہوئے انہیں "حیرت انگیز آدمی” قرار دیا اور انتخابی مہم کے دوران ان کے ساتھ گزارے ہوئے وقت کا ذکر کیا۔

انہوں نے کہا کہ ہمارے پاس ایک نیا ستارہ پیدا ہوا ہے: ایلون۔ وہ ایک حیرت انگیز آدمی ہیں۔ ہم آج رات اکٹھے ہی بیٹھے تھے۔ کیا آپ لوگ جانتے ہیں! ایلون نے فلاڈیلفیا میں مختلف مہمات میں حصہ لیا اور دو ہفتوں تک انتخابی مہم چلائی۔

ٹرمپ نے اسپیس ایکس کے حالیہ لانچ کے مشاہدے کے بارے میں بتایا کہ جب میں نے یہ لانچ دیکھی تو میں نے کہا کہ یہ صرف ایلون ہی یہ کر سکتا ہے۔ اسی لیے میں اس سے پیار کرتا ہوں۔

واضح رہے کہ دن کے آغاز پر ایلون مسک، جو ممکنہ طور پر ٹرمپ انتظامیہ کے تحت حکومتی کارکردگی کے کمیشن کی قیادت کرسکتے ہیں، نے سوشل میڈیا پر ٹرمپ کی حمایت کا اظہار کرتے ہوئے ان کے ساتھ ایک تصویر پوسٹ کی تھی اور کہا تھا، "Game, Set and Match۔”