بھارت نے ایک مرتبہ پھر کھیل کو سیاست کی بھینٹ چڑھاتے ہوئے ایشیا کپ 2025ء سمیت ایشین کرکٹ کونسل (اے سی سی) کے تحت ہونے والے تمام ٹورنامنٹس سے دستبردار ہونے کا فیصلہ کرلیا۔
بھارت اور پاکستان کے درمیان بڑھتی ہوئی کشیدگی کے پیشِ نظر بھارتی کرکٹ بورڈ (بی سی سی آئی) نے پاکستان کرکٹ کو تنہا کرنے کے لیے مینز ایشیا کپ اور ویمنز ایمرجنگ ایشیا کپ سے دستبرداری کا فیصلہ کیا ہے۔
مینز ایشیا کپ رواں سال ستمبر میں کھیلا جانا ہے اور ویمنز ایمرجنگ ایشیا کپ جون کے مہینے میں سری لنکا میں شیڈول ہے، تاہم بھارتی ہٹ دھرمی کی وجہ سے رواں برس شیڈول ایشیا کپ نہ ہونے کا خدشہ پیدا ہوگیا ہے۔
بھارتی کرکٹ بورڈ کا مؤقف
اس حوالے سے بھارتی کرکٹ بورڈ کے عہدیدار کا کہنا ہے کہ ایشین کرکٹ کونسل کے صدر، چیئرمین پاکستان کرکٹ بورڈ (پی سی بی) محسن نقوی ہیں جبکہ بھارتی ٹیم ایک ایسی تنظیم کے تحت منعقد ٹورنامنٹ میں نہیں کھیل سکتی جس کا سربراہ پاکستان کا وزیر ہو۔
انہوں نے مزید کہا کہ فی الحال ویمنز ایمرجنگ ایشیا کپ سے دستبرداری کے فیصلے سے ایشین کرکٹ کونسل کو زبانی طور پر آگاہ کیا گیا ہے، ایشین کرکٹ کونسل کے باقی شیڈول ایونٹس کو بھی ہولڈ کردیا ہے۔
اُن کا کہنا تھا کہ ہم اس حوالے سے حکومت کے ساتھ مسلسل رابطے میں ہیں، مستقبل میں بھی اے سی سی کے ایونٹس میں شرکت غیر یقینی ہے۔
ایشیا کپ 2025 کے انعقاد پر سوالیہ نشان
واضح رہے کہ ایشیا کپ 2025 کی میزبانی بھارت کو دی گئی تھی، لیکن پاکستان کے خلاف میچ نہ ہونے کی صورت میں ٹورنامنٹ کی مالی اہمیت ختم ہو جاتی ہے۔
ایشیا کپ جیسے بڑے ٹورنامنٹ میں سب سے زیادہ توجہ کا مرکز پاک-بھارت ٹاکرا ہوتا ہے، جسے دنیا بھر میں کروڑوں شائقین دیکھتے ہیں لیکن بھارت کی پاکستان دشمنی سے پورے خطے میں کرکٹ کا مستقبل خطرے میں پڑ چکا ہے۔
بھارت کی اس ضد سے سری لنکا، بنگلہ دیش اور افغانستان جیسے ممالک بھی مالی نقصان کا شکار ہوں گے، جو اس ایونٹ سے ریونیو حاصل کرتے ہیں۔
یاد رہے کہ 2023 کے ایشیا کپ میں بھی بھارت نے پاکستان میں کھیلنے سے انکار کردیا تھا جسکے بعد پاکستان نے فراخدلی کا مظاہرہ کرتے ہوئے ایک ‘ہائبرڈ ماڈل’ کو قبول کیا تھا جس کے تحت کچھ میچز سری لنکا میں کروائے گئے تھے۔
بعدازاں رواں برس پاکستان کی میزبانی میں چیمپئنز ٹرافی کیلئے بھی بھارت نے ٹیم پاکستان بھیجنے سے انکار کردیا تھا جسکے بعد پاکستان نے کرکٹ کی بقا کی خاطر ایک بار پھر ہائبرڈ ماڈل پر اتفاق کرلیا تھا۔
تاہم اب بھارت کا اپنی ہی میزبانی میں شیڈول ‘ایشیا کپ’ نہ کھیلنے کا فیصلہ اِس بات کا ثبوت ہے کہ بھارت کھیل کو اپنی انتہاپسندی پر مبنی سیاست کی بھینٹ چڑھانے سے باز نہیں آرہا۔
