ایک فیس بک پوسٹ میں دعویٰ کیا گیا ہے کہ اسلام آباد انٹرنیشنل ائیرپورٹ پر 6 ماہ سے غیر دعویٰ شدہ سامان کو صرف 560 روپے میں خریدا جا سکتا ہے، اگر کوئی شخص آن لائن دیے گئے لنک پر رجسٹریشن کرے۔
یہ دعویٰ غلط ہے۔
دعویٰ
”ائیرپورٹ اناؤنسمنٹس/ISB“ نامی ایک فیس بک پیج نے 20 جون کو ایک پوسٹ شیئر کی، جس میں دعویٰ کیا گیا کہ پاکستان کے وفاقی دارالحکومت کے بین الاقوامی ائیرپورٹ پر عوام کو ایک ”منفرد موقع“ دیا جا رہا ہے، جس کے تحت وہ صرف 560 روپے میں غیر دعویٰ شدہ سامان گھر لے جا سکتے ہیں۔
پوسٹ میں لکھا تھا: ”ہر سال ہمارے ائیرپورٹ پر سینکڑوں سوٹ کیس بغیر دعویٰ کے رہ جاتے ہیں، پالیسی کے مطابق، اگر 6 ماہ تک کوئی دعویٰ نہ کیا جائے تو یہ دوبارہ تفویض کیے جاسکتے ہیں، اس سال، ہم یہ بیگز عوام کو علامتی قیمت 560 روپے فی بیگ کے حساب سے پیش کر رہے ہیں۔“
پوسٹ میں مزید عوام کو دی گئی ویب سائٹ پر رجسٹریشن کی دعوت دی گئی ہے۔ یہ فیس بک پوسٹ اب تک 125 لائکس حاصل کر چکی ہے اور واٹس ایپ گروپوں میں بھی گردش کر رہی ہے۔
حقیقت
دو سرکاری حکام نے تصدیق کی ہے کہ اسلام آباد انٹرنیشنل ائیرپورٹ نے ایسی کوئی پالیسی متعارف نہیں کروائی۔
پاکستان ائیرپورٹس اتھارٹی کے ترجمان سیف اللہ خان نے جیو فیکٹ چیک کو میسجز کے ذریعے بتایا کہ آن لائن دعوے ”جعلی“ ہیں، اور ان کی اتھارٹی نے باضابطہ طور پر اس دعویٰ کو مسترد کر دیا ہے۔
20 اپریل کو پاکستان ائیرپورٹس اتھارٹی کے سرکاری فیس بک پیج پر درج ذیل بیان جاری کیا گیا: ”فیک نیوز الرٹ! ہمیں معلوم ہوا ہے کہ ایک پوسٹ آن لائن گردش کر رہی ہے جس میں دعویٰ کیا گیا ہے کہ اسلام آباد انٹرنیشنل ائیر پورٹ پر گمشدہ سامان فروخت کیا جا رہا ہے، یہ معلومات مکمل طور پر جھوٹی اور گمراہ کن ہیں۔“
یہ پوسٹ یہاں دیکھی جا سکتی ہے:
اسلام آباد انٹرنیشنل ائیرپورٹ کے میڈیا کوآرڈینیٹر شوکت ایاز نے بھی سوشل میڈیا پر گردش کرنے والے دعووں کو غلط قرار دیا۔
اس کے علاوہ، آن لائن دعووں میں دیا گیا لنک ایک ایسی ویب سائٹ کی طرف لے جاتا ہے جو قابل رسائی نہیں ہے۔
فیصلہ: یہ دعویٰ کہ اسلام آباد انٹرنیشنل ائیرپورٹ عوام کو غیر دعویٰ شدہ سامان 560 روپے فی آئٹم کے حساب سے فراہم کر رہا ہے، غلط ہے۔
