کینیڈا میں ایک شخص نے اپنی بیوی کی کھوئی ہوئی شادی کی انگوٹھیاں ڈھونڈنے کے لیے کچرے کا ڈھیر چھان مارا۔
کینیڈا کا ایک شادی شدہ جوڑا سنیما میں فلم دیکھنے کے بعد پاپ کارن بیگ لیے گھر آیا اور پاپ کارن کھاکر خالی بیگ گھر کے صحن میں پھینک دیا۔
رپورٹ کے مطابق کچھ دیر بعد کچرے کو اٹھاتےہوئے اسٹیو وان کی 26 سالہ بیوی جینین کی انگوٹھیاں اس پاپ کارن کے تھیلے میں غلطی سے گرگئیں مگر کچرا گھر سے جمع کرکے لے جانے کے بعد جوڑے کو یہ احساس ہوا کہ انگوٹھیاں غائب ہیں۔
گھر کی سی سی ٹی وی فوٹیجز دیکھنے کے بعد جوڑے کو معلوم ہوا کہ انگوٹھیاں کچرے کے تھیلے کے ساتھ ہی چلی گئی ہیں اور پھر بیوی کی انگوٹھیوں کی تلاش شوہر کو کچرے کے ڈھیر (لینڈ فل سائٹ) تک لے گئی۔
اسٹیو وان نے کہا کہ میری بیوی اس حوالے سے کافی شکی تھی تو میں نے کہا کہ میں کچرے کے ڈھیر پر جاؤنگا اور انہیں تلاش کرونگا جس پر ان کی بیوی نے جواب دیا کہ وہ آپ کو نہیں جانے دینگے، اس پر اسٹیو وان نے کہا کہ اگر میں نہیں گیا تو اس بارے میں کبھی معلوم نہیں ہوسکے گا۔
رپورٹ کے مطابق 15 اگست کو اسٹیو وان دستانے پہنے اور ہاتھ میں بیلچا لیے کچرے کے ڈھیر پر پہنچا اور اس پاپ کارن بیگ اور انگوٹھیوں کی تلاش شروع کردی۔
رپورٹ میں بتایا گیا کہ معجزانہ طور پر اسٹیووان کو پہلی انگوٹھی اس وقت ملی جب انہوں نے کچھ کھانے کی اشیاء کو پہچان لیا جنہیں ان کےگھر والوں نے کچرے کے ساتھ پھینک دیا تھا اور پھر ایک گھنٹے کے اندر اندر ہی انہیں دوسری انگوٹھی بھی مل گئی۔
اسٹیو وان نے کہا کہ ‘بہت سے لوگ اس کہانی سے حیران ہیں، میں خود بھی حیران ہوں، جب آپ تمام امیدوں کے ساتھ آگے بڑھتے ہیں تو آپ کرسکتے ہیں جو آپ کرنا چاہتے ہیں۔’
