سندھ حکومت نے ماہی گیر برادری کے لیے 515 ملین روپے کے فیول سبسڈی پیکیج کی منظوری دے دی۔
وزیراعلیٰ ہاؤس میں وزیراعلیٰ سید مراد علی شاہ کی زیر صدارت اجلاس سندھ کابینہ کا اجلاس ہوا۔ فیصلے سے کراچی، ٹھٹو، سجاول اور بدین کے ماہی گیر مستفید ہوں گے۔
وزیراعلیٰ سندھ نے کہا کہ ماہی گیروں کو فوری مالی سہارا فراہم کر رہے ہیں۔ انہوں نے دو ماہ کے فیول اخراجات کے لیے ایک وقتی ادائیگی کا اعلان بھی کیا۔
کابینہ کو آگاہ کیا گیا کہ ڈیزل قیمتوں میں اضافے سے مچھلی کے شکار میں 20 فیصد کمی ہوئی ہے، کابینہ کو آگاہ کیا گیا کہ ہزاروں خاندانوں کا روزگار بچانا ہماری ترجیح ہے۔
اسکیم کے تحت 9ہزار 634 رجسٹرڈ کشتیوں کو سبسڈی دینے کا فیصلہ کیا گیا، 20 ہارس پاور انجن والی 2ہزار 331 چھوٹی ساحلی کشتیوں کو فی کشتی 2 لاکھ روپے سبسڈی دی جائے گی۔
چھوٹی ساحلی کشتیوں کے لیے مجموعی طور پر 466.2 ملین روپے مختص کیے گئے ہیں، 10 ہارس پاور انجن والی 488 کشتیوں کے لیے ایک لاکھ روپے فی کشتی سبسڈی منظور کی گئی۔ چھوٹی کشتیوں کے لیے مجموعی طور پر 28.8 ملین روپے رکھے گئے ہیں۔
سندھ کابینہ نے سبسڈی کی ادائیگی ڈیجیٹل طریقے سے کرنے کا فیصلہ کیا ہے۔ وزیراعلیٰ نے کہا کہ آن لائن رجسٹریشن کے بعد ماہی گیروں کو ادائیگیاں کی جائیں گی۔
کابینہ کو بریفنگ میں بتایا گیا کہ ماہی گیروں کو ڈی جی میرین یا کراچی فشریز ہاربر اتھارٹی کے ساتھ آن لائن رجسٹریشن مکمل کرنا ہوگی، تصدیق کے بعد رقم براہِ راست کشتی مالکان کے بینک اکاؤنٹس میں منتقل کی جائے گی۔
ماہی گیری سبسڈی عمل کی نگرانی لائیو اسٹاک اور فشریز ڈیپارٹمنٹ کی مشترکہ مینجمنٹ کمیٹی کرے گی۔
وزیراعلیٰ سندھ نے کہا کہ شفاف نظام کے تحت رقم براہِ راست اکاؤنٹس میں منتقل کی جائے۔ انہوں ںے حکومتی نگرانی میں سبسڈی کی تقسیم اور شفافیت یقینی بنانے کا عزم کا اظہار کیا۔
