ایک کروڑ 18 لاکھ روپے کے جعلی چیک کیس کے ملزم کی ضمانت خارج

لاہور (کورٹ رپورٹر) لاہور ہائیکورٹ نے ایک کروڑ 18لاکھ روپے کے مبینہ جعلی چیک کے مقدمے میں نامزد ملزم عامر کی ضمانت کی درخواست
خارج کر دی، ضمانت خارج ہوتے ہی ملزم نے احاطہ عدالت سے فرار ہونے کی کوشش کی تاہم پولیس اور سکیورٹی اہلکاروں نے اسے پکڑ لیا۔ تفصیلات کے مطابق جعلی چیک کیس میں ملزم عامر کی ضمانت کی درخواست پر لاہور ہائیکورٹ میں سماعت ہوئی۔ جسٹس خالد ابن عزیز نے ملزم کی درخواست ضمانت پر سماعت کی۔ عدالت کی جانب سے ضمانت کی درخواست خارج کیے جانے کے بعد ملزم عامر نے احاطہ ہائیکورٹ سے فرار ہونے کی کوشش کی۔ ملزم کی فرار کی کوشش پر مدعی، ملزم پارٹی اور پولیس اہلکاروں کے درمیان ہاتھاپائی شروع ہوگئی، جس کے باعث ہائیکورٹ کے احاطے میں صورتحال کشیدہ ہوگئی۔ واقعے کے دوران لڑائی مار کٹائی کے باعث کچھ دیر کے لیے ہائیکورٹ کا ماحول بھی متاثر ہوا۔ ہائیکورٹ سکیورٹی اور پولیس اہلکاروں نے کارروائی کرتے ہوئے ملزم عامر کو قابو کرلیا۔ پولیس نے ملزم کو حراست میں لے کر تھانہ ریس کورس کے حوالے کر دیا۔ پولیس کے مطابق ملزم عامر کے خلاف جعلی چیک کا مقدمہ پہلے ہی تھانہ ریس کورس میں درج ہے۔ پولیس کا کہنا ہے کہ ملزم کے خلاف مقدمے میں مزید قانونی کارروائی جاری ہے۔