بھارت میں ایک شخص نے پسند کی شادی کرنے پر اپنی بیٹی کو پولیس اسٹیشن میں قتل کردیا۔
غیرملکی میڈیا کے مطابق بھارتی ریاست اتر پردیش کے ضلع باندہ سے تعلق رکھنے والی 19 سالہ شیوانی نے گزشتہ ماہ 18 مئی کو اپنے پڑوسی للت ورما کے ساتھ ایک مندر میں پسند کی شادی کی اور اپنی شادی کو رجسٹرڈ کروایا۔
میڈیا رپوٹس میں بتایا گیا ہے کہ للت کے خلاف اس کے والدین نے پولیس میں مقدمہ درج کرایا تھا جس کے بعد جوڑے کی تلاش شروع کی گئی اور خفیہ اطلاع پر کارروائی کرتے ہوئے، پولیس نے انہیں مدھیہ پردیش سے حراست میں لیا۔
پولیس کے مطابق دوران تفتیش جوڑے نے بتایا کہ انہوں نے اپنی رضامندی سے شادی کی ہے اور شادی کے متعلقہ دستاویزات بھی پیش کیے۔
میڈیا رپورٹس کے مطابق پولیس شیوانی کا طبی معائنہ کرنے اور اس کا بیان ریکارڈ کرنے کی تیاری کر رہی تھی کہ اسی دوران جوڑے کے اہل خانہ پولیس اسٹیشن پہنچ گئے۔
کونسلنگ سیشن کے دوران خاتون کے والدین نے اس پر دباؤ ڈالتے ہوئے گھر واپس آنے پر زور دیا لیکن وہ اپنے شوہر کے ساتھ رہنے کی خواہشمند تھی، اسی دوران باپ نے چاقو کے وار سے بیٹی پر حملہ کردیا جس سے وہ شدید زخمی ہوئی اور دوران علاج دم توڑ گئی۔
پولیس کے مطابق پولیس نے لڑکی کے والد کو گرفتار کرکے مقدمہ درج کرلیا۔
