پنجاب ریونیو اتھارٹی کا دائرہ کار بڑھانے کا فیصلہ، 250 انفورسمنٹ و آڈٹ افسران تعینات ہوںگے

لاہور (این این آئی) پنجاب ریونیو اتھارٹی میں ٹیکس وصولیوں، انتظامی اصلاحات اور ڈیجیٹل مانیٹرنگ کے ذریعے ریونیو نظام میں بہتری کا عمل
تیز کر دیا گیا ، پنجاب ریونیو اتھارٹی کے دائرہ کار میں توسیع کا فیصلہ، اگلے ماہ 250 انفورسمنٹ اور آڈٹ افسران کی تعیناتی ہوگی، کم ریونیو دینے والے شعبوں کی ٹیکس وصولیوں میں بہتری کیلئے افسران کو ٹاسک سونپے جائیں گے۔ اس حوالے سے چیئرمین پنجاب ریونیو اتھارٹی معظم اقبال سپرا کی زیر صدارت محکمانہ استعداد کار میں اضافہ بارے اہم اجلاس ہوا۔ چیئرمین پی آر اے نے افسران کو ہدایت کی کہ ٹیکس وصولی کے نظام کو مزید موثر، شفاف اور ڈیجیٹل بنانے کیلئے انتظامی و ٹیکنالوجیکل اصلاحات پر توجہ مرکوز کریں۔ پی آر اے کے دائرہ کار میں توسیع کے ساتھ ڈویژنل سطح سے ضلعی سطح تک انفورسمنٹ اور مانیٹرنگ کا نظام مزید فعال کیا جارہا ہے۔ ٹیکس ادائیگی میں جعلسازی کے خلاف موثر مانیٹرنگ اور انفورسمنٹ کارروائیوں کو مزید موثر بنایا جائے گا۔ انفورسمنٹ اور آڈٹ ونگز کیلئے نئے افسران کی تعیناتی سے انتظامی امور میں بہتری اور ریونیو میں اضافہ ہوگا۔ معظم اقبال سپرا نے کہا کہ ڈیجیٹل سنٹرل مانیٹرنگ سیل، مختلف سروسز سیکٹرز کے ریکارڈ کی ڈیجیٹل چھان بین سے جعلسازی اور خردبرد کو بے نقاب کرے گا۔ڈیجیٹل اور کیش ادائیگیوں میں ممکنہ بے ضابطگیوں، ریکارڈ میں جعلسازی کی نشاندہی کیلئے جدید نظام کا استعمال ناگزیر ہے۔ سہولت اسمارٹ ایپ کے ذریعے انوائس کی تصدیق، رسید کی جانچ اور غیر قانونی یا جعلی رسیدوں کی رپورٹنگ کی سہولت فراہم کی جارہی ہے۔ چیئرمین پی آر اے نے ٹیکس دہندگان کو اصل رسید کے حصول اور کیو آر کوڈ کے ذریعے رسید کی تصدیق کے بارے میں آگاہی مہم کو تیز کرنے کی ہدایت کی ہے۔