لاہور ( نیوز ایجنسیاں، مانیٹرنگ ڈیسک ) پی ٹی آئی خیبر پختونخوا کے صدر جنید اکبر نے اعلان کیا ہے کہ اس مرتبہ لاشیں گریں تو اسلام آباد کو سومنات بنادیں گے۔ وزیر اعلیٰ خیبرپختونخوا سہیل آفریدی نے کہا ہے کہ خواتین کو نشانہ بناکر نظریے کو شکست نہیں دی جاسکتی، سینیٹ میں اپوزیشن لیڈر علامہ راجہ ناصر عباس نے کہا ہے کہ علیمہ خان کی گرفتاری سے ظاہر ہوتا ہے کہ حکومت 27 ستمبر کے احتجاج سے ڈر گئی جبکہ پی ٹی آئی نے گرفتاریوں کے خدشے کے پیش نظر ارکان اسمبلی کو خیبر پختونخوا سے باہر جانے سے روک دیا ۔ صدر پاکستان تحریک انصاف (پی ٹی آئی)خیبرپختونخوا جنید اکبر نے لانگ مارچ کے حوالے سے کہا ہے کہ پچھلی مرتبہ ہم لاشیں اٹھا کر واپس چلے گئے تھے، اس مرتبہ ایسا نہیں ہوگا، ہم اسلام آباد کو سومنات بنائیں گے۔مردان میں ورکرکنونشن سے خطاب کرتے ہوئے جنید اکبر کا کہنا تھا کہ ہم اسلام آباد جائیں گے اور ایک راستے سے نہیں جائیں گے۔انہوں نے کہا کہ ہم موٹروے اور جی ٹی روڈ سے بھی جائیں گے، مارگلہ کے پہاڑوں سے بھی اتریں گے اور ہم ڈی آئی خان سے بھی اتریں گے۔اپنے خطاب میں جنید اکبر نے کہا کہ پچھلی مرتبہ ہم اپنی لاشیں اٹھا کر واپس چلے گئے تھے اور ہم اس پوزیشن میں نہیں تھے کہ احتجاج کرسکتے، اس دفعہ ایسا نہیں ہوگا کہ لاشیں دفن کرکے خاموش رہیں۔ جنید اکبر نے کہا کہ اسلام آباد کو ہم سومنات بنائیں گے۔قبل ازیں چیئرمین پاکستان تحریکِ انصاف بیرسٹر گوہر نے کہا ہے کہ سیاسی مسائل کے سیاسی حل کے لیے ہر فریق کو ایک قدم پیچھے ہٹنا ہوگا۔ ایک ٹی وی چینل سے گفتگو کے دوران بیرسٹر گوہر نے محسن نقوی کے ساتھ ملاقاتوں کی تردید سے انکار کرتے ہوئے کہا کہ ملاقاتیں ہوتی رہتی ہیں، مذاکرات ہونے چاہئیں، فی الحال ماحول ٹھنڈا ہے اور کوئی بات نہیں بن سکی۔انہوں نے کہا کہ احتجاج میں کوئی قانون نہیں توڑیں گے اور نہ راستے بند کریں گے جبکہ لانگ مارچ میں سرکاری وسائل کا بالکل استعمال نہیں کیا جائے گا۔دوسری جانب تحریک انصاف کی قیادت نے گرفتاریوں کے خدشے کے پیش نظر ارکان اسمبلی کو خیبرپختونخوا سے باہر جانے سے روک دیا جبکہ پنجاب سے پی ٹی آئی کے رہنماؤں کی خیبرپختونخوا میں پناہ لیے جانے کا امکان ہے۔نجی ٹی وی کے مطابق تحریک انصاف کی جانب سے 27ستمبر کے احتجاج کے پیش نظررہنماؤں کی گرفتاریوں کا خدشہ ظاہر کیا جارہا ہے۔
تحریک انصاف
