راولپنڈی، اسلام آباد(مانیٹرنگ ڈیسک ) صوبہ خیبر پختونخوا کے ضلع ہنگو میں سکیورٹی فورسز نے کارروائی کرتے ہوئے 8خوارجی دہشت گردوں کو ہلاک کردیا جبکہ 6جوان شہید ہوگئے، ادھر بلوچستان کے علاقے قلات میں ایک کارروائی کے دوران 5 دہشت گرد جہنم واصل جبکہ 23 مغویوں کو بحفاظت بازیاب کرالیا گیا۔پاک فوج کے شعبہ تعلقات عامہ (آئی ایس پی آر)کے مطابق ضلع ہنگو میں سکیورٹی فورسز کے قافلے اور خوارج کے درمیان فائرنگ کا تبادلہ ہوا، جس کے نتیجے میں موثر کارروائی کے دوران بھارتی سرپرستی میں سرگرم فتنہ الخوارج کے 8خوارج ہلاک ہوگئے۔آئی ایس پی آر کے مطابق شدید فائرنگ کے تبادلے کے دوران اپنے دستوں کی قیادت فرنٹ سے کرنے والے دو بہادر افسران اور 4جوانوں نے بھی جامِ شہادت نوش کیا، شہید ہونے والوں میں 23سالہ کیپٹن ابوزر فاروق، ساکن ضلع گوجرانوالہ، اور 22سالہ لیفٹیننٹ شیراز بابر، ساکن ضلع چکوال، شامل ہیں۔ترجمان پاک فوج کے مطابق دونوں افسران نے اپنے چار جوانوں کے ہمراہ بہادری سے لڑتے ہوئے مادرِ وطن کے لیے اپنی جانوں کا نذرانہ پیش کیا۔آئی ایس پی آر کا کہنا ہے کہ علاقے میں ممکنہ طور پر موجود دیگر بھارتی سرپرستی میں سرگرم خوارج کے خاتمے کے لیے کلیئرنس آپریشن جاری ہے۔ترجمان پاک فوج کا کہنا ہے کہ سکیورٹی فورسز اور قانون نافذ کرنے والے اداروں کی جانب سے عزمِ استحکام کے تحت دہشتگردی کے خلاف کارروائیاں پوری رفتار سے جاری رہیں گی، تاکہ ملک سے بیرونی سرپرستی اور معاونت حاصل کرنے والی دہشتگردی کا مکمل خاتمہ کیا جاسکے۔آئی ایس پی آر نے کہا کہ شہید ہونے والے بہادر جوانوں اور افسران کی قربانیاں ہر قیمت پر وطن کے تحفظ کے غیر متزلزل عزم کو مزید مضبوط کرتی ہیں۔ ادھر سکیورٹی فورسز نے بلوچستان میں قلات کے قریب این 25 پر دہشت گردوں کی عوامی آمدورفت میں خلل ڈالنے کی کوشش ناکام بناتے ہوئے 5 دہشت گردوں کو ہلاک کردیا۔آئی ایس پی آر کے مطابق سکیورٹی فورسز نے بروقت کارروائی کرکے دہشت گردوں کے ٹھکانے سے 23مغوی بحفاظت بازیاب کروائے۔دہشت گردوں نے اغوا، بھتہ خوری اور گاڑیاں چھیننے کے لیے چیک پوسٹ قائم کر رکھی تھی۔دہشت گردوں کے ٹھکانے سے 6ٹرک، 3بسیں اور 2کاریں برآمد کی گئیں جبکہ بڑی تعداد میں اسلحہ، گولہ بارود اور دھماکا خیز مواد قبضے میں لیا گیا۔دوسری جانب خاران میں دہشت گردوں نے مسافر گاڑی پر آئی ای ڈی حملہ کیا جس سے 10مزدور زخمی ہوگئے۔ دریں اثناء قلات کے قریب کامیاب آپریشن پرصدرمملکت،وزیراعظم اوروفاقی وزیرداخلہ نے سکیورٹی فورسز کو خراج تحسین پیش کیاہے۔ صدر آصف زرداری نے کہاہے کہ قوم دہشت گردی کیخلاف جنگ میں سکیورٹی فورسز کے شانہ بشانہ ہے۔ وزیراعظم شہبازشریف نے کہاہے کہ آپریشن عزم استحکام کے تحت دہشت گردی کیخلاف فیصلہ کن کارروائیاں جاری رہیں گی۔ وفاقی وزیر داخلہ محسن نقوی نے قلات میں این 25 پر فتنہ الہندوستان کے 5 دہشت گردوں کو جہنم واصل کرکے 23 مغویوں کو بازیاب کرانے پرسکیورٹی فورسز کی پیشہ وارانہ صلاحیتوں کی تعریف کرتے ہوئے کہاکہ سکیورٹی فورسز نے بروقت کارروائی کرکے فتنہ الہندوستان کے دہشت گردوں کے مذموم عزائم کو ناکام بنایا۔ محسن نقوی نے کہاکہ سکیورٹی فورسز نے جرات و بہادری سے کارروائی کرتے ہوئے 23 شہریوں کو بحفاظت بازیاب کرایا، دہشت گردی کے خلاف جنگ میں قوم سکیورٹی فورسز کے شانہ بشانہ کھڑی ہے۔
دہشت گرد ہلاک
