اینٹیگوا اینڈ باربوڈا فالکنز نے جمیکا کنگز مین کو 8 وکٹوں سے شکست دے کر 2026 کیریبین پریمیئر لیگ (CPL) کا ٹائٹل اپنے نام کرلیا۔ یہ فالکنز کی تاریخ کا پہلا سی پی ایل ٹائٹل ہے۔
برج ٹاؤن کے کینسنگٹن اوول میں کھیلے گئے فائنل میں جمیکا کنگز مین نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 170 رنز بنائے۔ پاکستانی بیٹر معاذ صادق نے شاندار بیٹنگ کرتے ہوئے 114 رنز کی اننگز کھیلی۔ وہ سی پی ایل فائنل میں سنچری بنانے والے پہلے بیٹر بھی بن گئے۔
فالکنز کی جانب سے پاکستانی اسپنر سفیان مقیم نے تباہ کن باؤلنگ کرتے ہوئے 4 اوورز میں صرف 14 رنز دے کر 4 وکٹیں حاصل کیں۔
171 رنز کے ہدف کے تعاقب میں فالکنز نے جارحانہ آغاز کیا۔ امیر جنگو نے ناقابلِ شکست 57 رنز بنائے، جبکہ حسن نواز 47 رنز بنا کر ناٹ آؤٹ رہے۔ دونوں نے تیسری وکٹ کے لیے 89 رنز کی ناقابلِ شکست شراکت قائم کی۔
فالکنز نے ہدف 16.4 اوورز میں 2 وکٹوں کے نقصان پر 173 رنز بنا کر حاصل کرلیا اور یوں فائنل 8 وکٹوں سے جیت لیا۔ حسن نواز نے چھکا لگا کر ٹیم کو تاریخی فتح دلائی۔
اس کامیابی کے ساتھ اینٹیگوا اینڈ باربوڈا فالکنز نے اپنے صرف تیسرے سی پی ایل سیزن میں پہلی مرتبہ چیمپئن بننے کا اعزاز حاصل کرلیا۔
