سمارٹ لاک ڈاؤن پولیس ضلعی انتظامیہ کیلئے کمائی کا ذریعہ

ملتان (سپیشل رپورٹر) حکومت کی طرف سے کفایت شعاری مہم کے سلسلے میں لگایا گیا سمارٹ لاک ڈاؤن کرونا کے بعد پولیس اور ضلعی انتظامیہ کیلئے کمائی کا ذریعہ بن گیا ہے، 9بجے شب دکانیں بند نہ کرنے والے درجنوں افراد کو قابو کیا جاتا ہے اور چند ہی فاصلے کے بعد انہیں ”مک مکا”کے بعد چھوڑنا معمول بن گیا ہے۔ اسی طرح شٹر گرا کر کاروبار کرنے والوں سے بھی تھانوں میں تعینات نچلا عملہ روزانہ کی بنیاد پر حصہ بقدر جثہ وصول کرنے میں مصروف ہے۔ ذرائع سے معلوم ہوا ہے کہ پٹرولیم کی قیمتوں میں مسلسل اضافہ اور معاشی توانائی سے نمٹنے کے پیش نظر حکومت کی جانب سے سمارٹ لاک ڈاؤن کا چند روز قبل آغاز کیا گیا جس کے تحت تمام کاروباری مراکز کو ٹھیک 9بند کرنے کے احکامات جاری کیے گئے ہیں۔ شادی ہالز10،بیکری اور ریسٹورنٹ کیلئے رات11بجے تک کا وقت مقررکیاگیا ہے جبکہ ہوم ڈیلیوری رات گئے تک جاری رکھنے کی اجازت ہے جسکو ملتان کے تھانوں میں تعینات سکیورٹی افسران و دیگر نچلے عملے نے اپنی کمائی کا ذریعہ بنالیا ہے۔ شٹر ڈال کر کام کرنے کی اجازت کے عوض روزانہ کی بنیاد پر دو ہزار سے پانچ ہزار وصول کیے جارہے ہیں جبکہ تھانوں میں روزانہ کی بنیاد پر دکانداروں کو حراست میں تو لیا جارہا ہے مگر مقدمات کے اندراج کی بجائے ”لین دین” کر کے انہیں آزاد کردیا جاتا ہے۔ تھانہ جلیل آباد، حرم گیٹ، پاک گیٹ، دہلی گیٹ، دولت گیٹ، چہلیک، کینٹ، گلگشت، بی زیڈ، ڈی ایچ اے، ممتاز آباد، شاہ شمس سمیت دیگر تھانوں کی حدود میں واقع پان و سگریٹ شاپس سے باقاعدہ وصولیوں کا انکشاف ہوا ہے، جبکہ تاجر برادری کا کہنا ہے کہ قانون سب کے لیے برابر ہونا چاہیے لیکن ملتان میں جس کی لاٹھی اس کی بھینس والا سلسلہ جاری ہے۔ جو مٹھی گرم کر دے اسے کوئی پوچھنے والا نہیں، اور جو مٹھی میں کچھ نہ رکھے اس پر فوری قانون نافذ العمل کر دیا جاتا ہے۔ واضح رہے کہ اس سے قبل کرونا کے دور میں بھی ملتان کے تھانوں میں تعینات ایس ایچ اوز نے خوب لوٹ مار مچائی تھی، جس کے ”ثمرات” سے وہ آج تک فیض یاب ہو رہے ہیں۔
لاک ڈاؤن