غزہ پر اسرائیلی حملے جاری 7فلسطینی شہید 38زخمی

غزہ(این این آئی)غزہ میں48گھنٹوں کے دوران اسرائیلی حملوں میں 7فلسطینی شہید اور 38زخمی ہوگئے۔ روسی خبر رساں ادارے نے فلسطینی وزارت صحت کے ایکس پر بیان کے حوالے سے بتایا کہ شہید ہونے والے 7افراد کی نعشیں غزہ کے ہسپتالوں میں منتقل کر دی گئی ہیں جبکہ 38زخمیوں کو طبی امداد فراہم کی گئی جن میں خواتین اور بچے بھی شامل ہیں۔رپورٹ کے مطابق زیادہ تر متاثرین شیخ رضوان محلے اور نصیرات پناہ گزین کیمپ سے لائے گئے جہاں اسرائیلی فورسز کی جانب سے شدید فائرنگ کی گئی۔ وزارتِ صحت نے بتایا کہ 11اکتوبر 2025کو جنگ بندی شروع ہونے کے بعد اسرائیلی فضائی حملوں اور توپ خانے کی گولہ باری میں 1,415فلسطینی شہید اور 4,953زخمی ہو چکے ہیں۔ وزارت کے مطابق اکتوبر 2023سے غزہ میں اسرائیلی حملوں میں اب تک 74,016فلسطینی شہید جبکہ175,068زخمی ہو چکے ہیں۔
اسرائیلی جارحیت