غیر قانونی پتنگ فروشوں کیخلاف کارروائیاںتیز ‘2ملزم گرفتار

لاہور(کرائم رپورٹر)ڈی آئی جی آپریشنز فیصل کامران کی ہدایت پر لاہور پولیس نے غیر قانونی پتنگ فروشوں کے خلاف کارروائیاں تیز کر دیں۔
شالیمار اور گڑھی شاہو پولیس نے کارروائی کرتے ہوئے دو پتنگ فروشوں کو گرفتار کر لیا۔شالیمار پولیس نے جی ٹی روڈ سے ملزم ڈینیئل مسیح کو گرفتار کرکے اس کے قبضے سے 700 پتنگیں برآمد کر لیں، جبکہ گڑھی شاہو پولیس نے کرم دین چوک سے ملزم علی کو گرفتار کیا۔ ملزم کے قبضے سے 60 پتنگیں اور ڈور کی چار چرخیاں برآمد ہوئیں۔ایس پی سول لائنز منزہ کرامت کے مطابق گرفتار ملزمان پابندی کے باوجود کاٹن کے ڈبوں میں پتنگیں چھپا کر فروخت کرتے تھے اور پتنگیں تیار کرکے لاہور کے مختلف علاقوں میں سپلائی کرتے تھے۔ دونوں ملزمان کے خلاف مقدمات درج کرکے انہیں مزید تفتیش کے لیے انویسٹی گیشن ونگ کے حوالے کر دیا گیا ہے۔ایس پی سول لائنز منزہ کرامت نے کہا کہ قانون کی خلاف ورزی کرنے والوں کے خلاف سخت کارروائی عمل میں لائی جائے گی۔