نیویارک میں خسرہ کے بڑھتے کیسز’ گورنر نے ریاستی ایمرجنسی نافذ کر دی

نیویارک (محسن ظہیر) نیویارک کی گورنر کیتھی ہوکل نے نیویارک سٹیٹ کے دیہی علاقوں اور پڑوسی ریاستوں میں خسرہ کے بڑھتے ہوئے کیسز کے پیش نظر، سٹیٹ ڈیزاسٹر ایمرجنسی نافذ کرنے کا اعلان کیا ہے۔ حکام کے مطابق رواں سال3 اکتوبر تک نیویارک سٹی میں خسرہ کے 7 جبکہ شہر سے باہر نیویارک سٹیٹ کے مختلف علاقوں میں101 کیسز کی تصدیق ہوچکی ہے جس کے بعد مجموعی تعداد108 ہوگئی ہے۔15 جولائی سے اب تک ریاست کی18 کانٹیز میں کم ویکسینیشن والے دیہی علاقوں سے خسرہ کے 92 کیسز رپورٹ ہوئے ہیں۔ مقامی محکمہ صحت کے اداروں نے ان علاقوں میں خسرہ، ممپس اور روبیلا (MMR) ویکسین کی ایک ہزار سے زائد خوراکیں بھی فراہم کی ہیں۔ گورنر کے نئے ایگزیکٹو آرڈر کے تحت ویکسین لگانے والے طبی عملے کے دائرہ کار کو مزید وسیع کرتے ہوئے پیرا میڈکس، ایڈوانسڈ ای ایم ایس عملہ، مڈوائفز اور فارماسسٹ کو بھی ویکسینیشن کی اجازت دی گئی ہے۔گورنر کیتھی ہوکل نے کہا کہ تازہ ترین اعداد و شمار کا جائزہ لینے کے بعد ریاستی ایمرجنسی نافذ کرنے کا فیصلہ کیا گیا ہے تاکہ خسرے کے پھیلائو سے نمٹنے کی کوششیں مزید موثر بنائی جاسکیں۔ ان کا کہنا تھا کہ ویکسین سے روکے جانے والے مرض کے باعث کسی شخص کو شدید بیمار یا جان سے نہیں جانا چاہیے اسی لیے ویکسین اور ٹیسٹنگ فراہم کرنے والے طبی ماہرین کی تعداد بڑھائی جارہی ہے۔گورنر ہوکل نے پیر کے روز خود فلو ویکسین بھی لگوائی اور نیویارک کے تمام شہریوں پر زور دیا کہ وہ بھی فلو سے بچائو کی ویکسین لگوائیں۔