این سی سی آئی اے لاہور’ جوہر ٹائون میں کال سنٹر پر چھاپہ’ 37ملزمان گرفتار

لاہور(کرائم رپورٹر)این سی سی آئی اے لاہور نے جوہر ٹاون میں غیر قانونی کال سینٹر پر چھاپہ مار کر 37 ملزمان کو گرفتار کر لیا۔ ملزمان پاکستان میں بیٹھ کر امریکہ اور کینیڈا کے شہریوں کو موبائل فون فروخت کرنے کا جھانسہ دے کر مالی فراڈ کا نشانہ بنا رہے تھے۔ کارروائی کے دوران 5 سی پی یوز، 40 لیپ ٹاپس اور 35 موبائل فونز سمیت 80 ڈیجیٹل ڈیوائسز برآمد کر لی گئیں۔این سی سی آئی اے لاہور نے اوپن سورس انٹیلی جنس (OSINT) سے حاصل ہونے والی معلومات کی بنیاد پر جوہر ٹاون فیز ون، بلاک ایف میں پلاٹ نمبر 103 پر چھاپہ مارا۔ کارروائی ایڈیشنل ڈائریکٹر این سی سی آئی اے لاہور کی منظوری اور مجاز عدالت سے سرچ وارنٹ حاصل کرنے کے بعد کی گئی۔چھاپے کے دوران کال سینٹر میں موجود 37 افراد کو آن لائن ڈائل اپ اور وائس اوور انٹرنیٹ پروٹوکول (VoIP) سافٹ ویئر کے ذریعے مبینہ طور پر فراڈ کی سرگرمیوں میں ملوث پایا گیا۔ ابتدائی تفتیش کے مطابق ملزمان امریکی اور کینیڈین موبائل سروس فراہم کرنے والی کمپنیوں کے نمائندے بن کر شہریوں سے رابطہ کرتے اور انہیں موبائل فون فروخت کرنے کا جھانسہ دیتے تھے۔ اس دوران شہریوں کے کریڈٹ اور ڈیبٹ کارڈز کی معلومات حاصل کی جاتی تھیں، جنہیں بعد ازاں غیر مجاز مالی لین دین کے لیے استعمال کیا جاتا تھا۔کارروائی کے دوران تحویل میں لیے گئے ڈیجیٹل آلات کے ابتدائی معائنے میں متعلقہ ڈائل اپ سافٹ ویئر اور فراڈ سے منسلک ڈیٹا بھی سامنے آیا ہے۔ تمام آلات کو ضابطے کے مطابق قبضے میں لے کر سیل کر دیا گیا ہے تاکہ فرانزک تجزیے کے ذریعے مزید شواہد حاصل کیے جا سکیں۔ابتدائی تفتیش کے مطابق کال سینٹر کی ملکیت حافظ علی احمد ولد شہباز احمد کے نام بتائی گئی ہے، جو چھاپے کے وقت موقع پر موجود نہیں تھا۔ مقدمہ نمبر 241/2026 مورخہ 10 اکتوبر 2026 درج کرکے تفتیش سب انسپکٹر محسن رزاق کے سپرد کر دی گئی ہے۔این سی سی آئی اے کے مطابق مقدمے میں پریوینشن آف الیکٹرانک کرائمز ایکٹ 2016 اور پاکستان پینل کوڈ کی متعلقہ دفعات شامل کی گئی ہیں۔ ملزمان کے کردار، امریکہ اور کینیڈا کے شہریوں کو نشانہ بنانے والے مبینہ مالی فراڈ کے دائرہ کار اور برآمد شدہ ڈیجیٹل شواہد کی مزید جانچ کے لیے تفتیش جاری ہے۔