لاہور ہائیکورٹ بار و لاہور بار ایسوسی ایشن کا کے پی میں گورنر راج کیخلاف اعلیٰ عدالتوں سے رجوع کا اعلان

لاہور (کورٹ رپورٹر) لاہور ہائیکورٹ بارایسوسی ایشن اور لاہور بار ایسوسی ایشن نے خیبر پختونخوا میں ایمرجنسی کے نفاذ اور گورنر راج کیخلاف اعلی عدالتوں سے رجوع کرنے کا اعلان کردیا۔ مشترکہ جنرل ہائوس اجلاس میں ایمرجنسی کے اقدام کی مذمت کی گئی۔ اجلاس سے خطاب کرتے ہوئے سینئر قانون دان حامد خان نے کہا کہ جب تک عدلیہ اور آئین بحال نہیں ہوتے، وکلا کی جدوجہد جاری رہے گی، وزیراعظم اور آصف علی زرداری بھی کٹھ پتلی ہیں حالات بہتر نہیں ہوں گے، حامد خان نے سہیل آفریدی کو خراج تحسین پیش کرتے ہوئے کہا کہ انہوں نے ثابت کیا کہ عہدے اہمیت نہیں رکھتے، انہوں نے بتایا کہ وکلا ایکشن کمیٹی کا اجلاس کل کراچی میں ہوگا جس میں آئندہ کا لائحہ عمل دیا جائے گا۔ صدر لاہور ہائیکورٹ بار بابر مرتضیٰ نے کہا کہ لاہور ہائیکورٹ بار اور لاہور بار خیبر پختونخوا میں ایمرجنسی اور گورنر راج کے خلاف اعلی عدالتوں سے رجوع کریں گی، قانون دان رائے محمد علی نے کہا کہ 2009 میں گورنر راج اور ایمرجنسی کا اقدام غیر قانونی اور غیر آئینی تھا تو آج بھی ایسا اقدام آئین کے مطابق نہیں ہوسکتا۔ اجلاس کے بعد وکلا نے لاہور ہائیکورٹ سے جی پی او چوک تک ریلی نکالی، مال روڈ اور جی پی او چوک پر ریلی کے دوران پولیس اور وکلا کے درمیان تصادم بھی ہوا، پولیس نے راستہ بند ہونے سے روکنے کے لیے وکلا کو آگے بڑھنے سے روکا۔ اجلاس میں صدر لاہور بار ایسوسی ایشن عرفان حیات باجوہ سمیت وکلا کی بڑی تعداد نے شرکت کی۔