راولپنڈی(سٹی رپورٹر)ڈپٹی کمشنر راولپنڈی کی ہدایات اور ایڈمنسٹریٹر جنرل بس اسٹینڈ (جی بی ایس) سید اسد عباس شیرازی کی نگرانی میں پیرودھائی جنرل بس اسٹینڈ پر منشیات اور آئس کے عادی افراد کے خلاف کارروائی جاری ہے۔ آپریشن کا مقصد بس اسٹینڈ کے احاطے کو نشے کے عادی افراد سے پاک کرنا، مسافروں اور شہریوں کو محفوظ ماحول فراہم کرنا اور عوامی مقام پر نظم و ضبط برقرار رکھنا ہے۔انتظامی کارروائی کے دوران بس اسٹینڈ کے مختلف حصوں میں موجود منشیات کے عادی افراد کو وہاں سے ہٹایا جا رہا ہے، جبکہ بس اسٹینڈ کے اندر اور اطراف میں صورتحال کو بہتر بنانے کے لیے اقدامات کیے جا رہے ہیں۔ انتظامیہ کی جانب سے عوامی مقامات پر نشے کے عادی افراد کی موجودگی سے پیدا ہونے والے مسائل پر قابو پانے اور مسافروں کی سہولت و سلامتی کو یقینی بنانے پر توجہ دی جا رہی ہے۔ذرائع کے مطابق کارروائی کے دوران یہ تشویش ناک امر بھی سامنے آیا ہے کہ نشے کے عادی بیشتر افراد کے پاس چاقو، بلیڈ اور دیگر تیز دھار کٹر موجود ہوتے ہیں، جس کے باعث مسافروں، ٹرانسپورٹرز اور دیگر شہریوں کی سلامتی کے حوالے سے خدشات پیدا ہوتے ہیں۔ اس صورتحال کے پیش نظر عوامی تحفظ کو مدنظر رکھتے ہوئے مثر انتظامی اقدامات کی اہمیت مزید بڑھ گئی ہے۔ڈپٹی کمشنر راولپنڈی کی ہدایات پر جاری اس کارروائی کے تحت پیرودھائی جنرل بس اسٹینڈ میں امن و امان کی صورتحال بہتر بنانے، مسافروں کو درپیش مشکلات کم کرنے اور بس اسٹینڈ کے ماحول کو محفوظ بنانے کی کوششیں جاری ہیں۔ ایڈمنسٹریٹر جی بی ایس سید اسد عباس شیرازی کی نگرانی میں جاری آپریشن کو عوامی سہولت اور تحفظ کے تناظر میں اہم قرار دیا جا رہا ہے جبکہ شہریوں اور مسافروں کے تحفظ کے لیے ضروری اقدامات کیے جا رہے ہیں۔
