گوادر فری زون میں صنعتی منصوبے معیشت کے فروغ میں اہم کردار ادا کر سکتے ہیں

گوادر (این این آئی) گوادر پورٹ اتھارٹی کے چیئرمین نورالحق بلوچ نے گوادر فری زون میں قائم چینی کمپنی ہینگینگ کے زیرانتظام گدھوں کے ذبح خانے کا دورہ کیا جہاں انہیں پیداواری سرگرمیوں اور کمپنی کے کاروباری امور کے بارے میں بریفنگ دی گئی۔ کمپنی ذبح خانے سے منسلک گدھوں کی فارمنگ کا کاروبار بھی کر رہی ہے۔ دورے کے دوران نورالحق بلوچ نے کہا کہ گوادر فری زون میں صنعتی منصوبے پاکستان کی معیشت اور برآمدات کے فروغ میں اہم کردار ادا کر سکتے ہیں۔ انہوں نے کہا کہ گوادر پورٹ اتھارٹی علاقے میں سرمایہ کاری لانے اور صنعتی ترقی کے لیے سازگار ماحول فراہم کرنے کی کوشش کر رہی ہے۔گوادر فری زون چین پاکستان اقتصادی راہداری کے وسیع تر منصوبے کا حصہ ہے جس کا مقصد مقامی اور بین الاقوامی منڈیوں کی ضروریات کے مطابق پیداواری، پراسیسنگ اور تجارتی سرگرمیوں کو فروغ دینا ہے۔