ایران کیساتھ جنگ جلد ختم ہوجائیگی بات کرنے کیلئے کوئی نہیں بچا: ٹرمپ

واشنگٹن(آئی این پی )امریکی صدر ڈونلڈ ٹرمپ نے ایک بارپھر دعوی کیا ہے کہ ایران کے ساتھ جنگ بہت جلد ختم ہو جائے گی، ایران کی ساری قیادت ختم ہو گئی، بات کرنے کے لئے کوئی نہیں بچا،سعودی عرب یمن کے حوثیوں کے خلاف اسرائیل کی مددگار پیشکش قبول کرے جبکہ صدر ٹرمپ نے روس پر نئی پابندیاں عائد کرنے کے منصوبے کے بڑے حصے کو معطل کر دیا ہے ۔غیرملکی خبررساںادارے کے مطابق صدر ڈونلڈ ٹرمپ نے جارجیا میں انتخابی ریلی سے خطاب کرتے ہوئے کہا ہے کہ شاید انہوں نے ایرانی رہنمائوں کے معاملے میں کچھ زیادہ ہی سخت رویہ اپنا لیا، کیونکہ اب ان کے پاس بات کرنے کے لیے کوئی نہیں بچا۔ انہوں نے ایک بار پھر دعوی کیا کہ ایران کے ساتھ جنگ بہت جلد ختم ہو جائے گی، امریکا کے پاس اسلامی جمہوریہ ایران کے حکام اور رہنماں کی تمام باتیں سننے کی صلاحیت موجود ہے۔امریکی وسط مدتی انتخابات سے قبل ایک انتخابی جلسے سے خطاب کرتے ہوئے ٹرمپ نے کہا کہ یقینا یہ خفیہ اور راز کی بات ہے، لیکن میں نے اب اسے ظاہر کر دیا ہے۔ امریکی صدر نے ایران کے ساتھ جنگ کو ایک فوجی مشق قرار دیا۔انہوں نے کہا کہ اگر آبنائے ہرمز کا نام تبدیل کرکے آبنائے ٹرمپ رکھ دیا جائے تو عرب ممالک کو کیسا محسوس ہوگا؟ یہ کام ہم آسانی سے کر سکتے ہیں ۔ صدر ڈونلڈ ٹرمپ نے سعودی عرب کو یمن کے حوثیوں کے خلاف اسرائیل کی مددگار پیشکش قبول کرنے کا مشورہ دیا ہے۔