پاکستان، انگلینڈ ون ڈے میچ چھاتی کے کینسر سے آگاہی کے نام

لاہور (سپورٹس رپورٹر)پاکستان کرکٹ بورڈ نے لاہور میں 25 اکتوبر کو پاکستان اور انگلینڈ کے درمیان ہونے والے ون ڈے انٹرنیشنل میچ کو خواتین میں چھاتی کے کینسر سے آگاہی کے لیے مختص کرنے کا اعلان کیا ہے۔اس خصوصی مہم کے تحت قومی ٹیم کے کھلاڑی میچ میں پنک کٹ پہن کر شرکت کریں گے۔ یہ اقدام پی سی بی اور چھاتی کے کینسر سے آگاہی کے لیے کام کرنے والے ادارے پنک ربن کی مشترکہ کاوش ہے، جس کا مقصد اس مرض کے بارے میں شعور اجاگر کرنے کے ساتھ ساتھ اس سے متاثرہ خواتین کی مدد کرنا ہے۔اس مہم کے سلسلے میں پی سی بی نے قومی کرکٹ ٹیم کے نمایاں کھلاڑیوں کی دستخط شدہ خصوصی فین شرٹس نیلام کرنے کا بھی اعلان کیا ہے۔بورڈ کے مطابق شاہین شاہ آفریدی اور بابر اعظم کے دستخط شدہ شرٹس نیلامی کے لیے پیش کی جائیں گی۔پی سی بی کا کہنا ہے کہ نیلامی سے حاصل ہونے والی رقم چھاتی کے کینسر میں مبتلا ان خواتین کے علاج پر خرچ کی جائے گی جو مالی مشکلات کے باعث اپنے علاج کے اخراجات برداشت کرنے سے قاصر ہیں۔اس اقدام کے ذریعے کرکٹ شائقین کو نہ صرف قومی کھلاڑیوں کی دستخط شدہ خصوصی شرٹس حاصل کرنے کا موقع ملے گا بلکہ وہ چھاتی کے کینسر سے متاثرہ خواتین کے علاج میں تعاون کرکے قیمتی جانیں بچانے کی کوششوں کا بھی حصہ بن سکیں گے۔