چکوال(بیورورپورٹ)چکوال شہر نوسرباز ، فراڈی اورشعبدہ بازگروہوں کے نرغے میں ، سادہ لوح اور نیم تعلیم یافتہ شہری ان کے ہاتھوں جمع پونجی اور قیمتی اشیاء سے محروم ہونے لگے ، عوامی و سماجی حلقوں کی طرف سے دیگر صوبوں اور اضلاع سے آنے والے ان نوسرباز گروہوں کے خلاف فوری کاروائی کا مطالبہ ، مردوخواتین پر مشتمل گروہ شہر کے
مصروف ترین شاہراہوں اور کاروباری مراکز پر مٹرگشت کر کے ان سادہ لوح شہریوں پر نظر رکھتا ہے جو خریداری کے لئے آتے ہیں اور موقع پا کر کبھی بڑا نوٹ چینج کرنے اور کبھی دیگر حیلے بہانوں سے بندے کو مصروف کر کے اس کی جمع پونجی ہتھیا لیتے ہیں ، اس حوالے سے متعدد شکایات سامنے آئی ہیں مگر اس نوسرباز گروہ پر ہاتھ نہ پڑنے کی وجہ سے اس گروہ کی وارداتیں حد سے بڑھ گئی ہیں ، گزشتہ دنوں اخبار فروش یونین کے ممبر محمد عامر جس کی 30ہزار روپے کی کمیٹی نکلی تھی کے پاس ایک شخص آیا اور اس سے ہزار روپے کا چینج مانگا، مذکورہ ہاکر نے کمیٹی کی رقم سے دو 5پانچ سو والے نوٹ نکال کر اسے دئیے اور ہزار روپیہ وصول کر کے تمام رقم جیب میں ڈال لی ، چند قدم کے فاصلے پر اچانک تین چار خواتین نے اس کو گھیر لیا اور باتوں میں الجھا کر ہاتھ کی صفائی سے اس کی جیب سے تیس ہزار روپے کی رقم نکال کر رفوچکر ہو گئیں ، اسی طرح کی کئی اور وارداتیں بھی سامنے آئی ہیں جس میں اسی طرح کا طریقہ واردات استعمال کیا گیا ہے ، سنجیدہ عوامی حلقوں کا یہ کہنا ہے کہ سیف سٹی کیمرے ہونے کے باوجود ان نوسرباز گروہوں کی وارداتیں محکمہ پولیس کے لئے لمحہ فکریہ ہیں ، ڈی پی او چکوال اس صورت حال کا سخت نوٹس لیتے ہوئے اس نوسرباز گروہ کو قانون کی گرفت میں لانے کے لئے فوری اقدامات اٹھائیں تا کہ سادہ لوح شہری اس نوسرباز گروہ کے ہاتھوں مزید لٹنے سے بچ سکیں ۔
