سرینا پولو کپ2026 ٹیا آسیان نے فائینل جیت لیا ٹیم ایچ این کو شکست

اسلام آباد (ملک منظور احمد) سرینا ہوٹلز کے زیراہتمام سرینا پولو کپ 2026 کا فائنل اسلام آباد کلب پولو گرائونڈ میں کھیلا گیا، جس میں ٹیم آسیان نے شاندار کھیل کا مظاہرہ کرتے ہوئے ٹیم ایچ این کو 3.5 گول کے فرق سے شکست دے کر ٹائٹل اپنے نام کر لیا۔ فائنل میں ٹیم آسیان نے مجموعی طور پر 10 گول سکور کیے جبکہ ٹیم ایچ این 6.5 گول بنا سکی۔ چار چکروں پر مشتمل مقابلے میں دونوں ٹیموں کے کھلاڑیوں نے مہارت اور بہترین ٹیم ورک کا مظاہرہ کیا۔ ٹیم آسیان کی جانب سے ایولوگیو نے چار گول سکور کیے جبکہ میثم بلوچ، حیدر اسد اور عبداللہ فیصل نے دو، دو گول کیے۔ اس طرح ٹیم آسیان نے مجموعی طور پر10 گول سکور کرکے کامیابی حاصل کی۔ ٹیم ایچ این کی جانب سے ابراہیم خلیل اور ساقب کھوکھوانی نے دو، دو گول کیے جبکہ حیدر نسیم اور سید محمد تراب رضوی نے ایک، ایک گول اسکور کیا۔ ٹیم ایچ این کو نصف گول کا ہینڈی کیپ بھی حاصل تھا، جس کے بعد اس کا مجموعی سکور 6.5 گول رہا۔ تقریب میں سفارتی برادری کے ارکان، سرکاری حکام، کاروباری شخصیات، صحافیوں اور پولو کے شائقین نے شرکت کی۔ اس موقع پر کھیلوں کے ذریعے باہمی روابط، دوستانہ مقابلے اور بین الاقوامی ہم آہنگی کو فروغ دینے کے عزم کا اظہار کیا گیا۔ سرینا ہوٹلز کے مطابق ادارہ کھیلوں کے فروغ اور کمیونٹی روابط مضبوط بنانے کے لیے مختلف اقدامات جاری رکھے ہوئے ہے۔ پولو کے علاوہ ٹینس، سکواش، گالف اور خواتین کی کرکٹ سمیت مختلف کھیلوں کی سرپرستی بھی کی جارہی ہے تاکہ نوجوانوں کی کھیلوں میں شمولیت، صنفی مساوات اور قومی فخر کو فروغ دیا جا سکے۔ سرینا پولو کپ 2026 کے فائنل نے کھیلوں کے ذریعے مقامی اور بین الاقوامی برادری کے درمیان روابط کو مزید مستحکم کرنے کے لیے سرینا ہوٹلز کی کوششوں کو اجاگر کیا۔