راولپنڈی(نمائندہ خصوصی ) آل پاکستان پرائیویٹ اسکولز مینجمنٹ ایسوسی ایشن (APPSMA) کے مرکزی سینئر نائب صدر محمد فرقان چوہدری کی زیرِ صدارت ایک اہم اجلاس منعقد ہوا، جس میں وزیراعلی پنجاب یوتھ اسپورٹس پروگرام کے تحت یوتھ گیمز کے انعقاد کو سراہتے ہوئے اسے طلبہ و طالبات کی جسمانی صحت، ذہنی نشوونما، مثبت سرگرمیوں اور کھیلوں کے فروغ کے لیے ایک خوش آئند اقدام قرار دیا گیا۔اجلاس میں اس امر پر زور دیا گیا کہ کھیل تعلیم و تربیت کا ایک اہم جزو ہیں اور نوجوان نسل کو صحت مندانہ سرگرمیوں کے مواقع فراہم کرنا وقت کی اہم ضرورت ہے۔ اس سلسلے میں ایپسما کی قیادت نے پنجاب حکومت کے اس اقدام کا خیرمقدم کرتے ہوئے تمام نجی تعلیمی اداروں کی انتظامیہ سے اپیل کی کہ وہ ضلعی حکومت اور محکمہ تعلیم کی جانب سے جاری کردہ ہدایات پر مکمل عمل درآمد یقینی بنائیں اور اپنے اداروں کے تمام اہل طلبہ و طالبات کی یوتھ اسپورٹس پروگرام میں رجسٹریشن کے عمل کو ترجیحی بنیادوں پر مکمل کریں۔اجلاس میں واضح کیا گیا کہ طلبہ و طالبات کی 100 فیصد رجسٹریشن یقینی بنانا تمام متعلقہ تعلیمی اداروں کی اہم ذمہ داری ہے۔ اس سلسلے میں اسکولوں کے داخلہ ریکارڈ اور رجسٹریشن ڈیٹا میں مطابقت برقرار رکھی جائے، درست معلومات فراہم کی جائیں اور مقررہ وقت کے اندر رجسٹریشن مکمل کرکے متعلقہ حکام کے ساتھ بھرپور تعاون کیا جائے، تاکہ پنجاب حکومت کے اس اہم پروگرام کے ثمرات زیادہ سے زیادہ طلبہ و طالبات تک پہنچ سکیں۔اجلاس کے شرکا نے اس عزم کا اظہار کیا کہ نجی تعلیمی ادارے تعلیمی سرگرمیوں کے ساتھ ساتھ کھیلوں، جسمانی تربیت اور کردار سازی کے فروغ میں بھی اپنا مثبت کردار ادا کرتے رہیں گے۔ ایپسما اس سلسلے میں ضلعی انتظامیہ اور محکمہ تعلیم کے ساتھ تعاون جاری رکھے گی، تاکہ یوتھ اسپورٹس پروگرام کو کامیاب بنایا جا سکے۔اجلاس میں ایپسما شمالی پنجاب کے صدر اور ممبر ڈسٹرکٹ رجسٹریشن اتھارٹی راولپنڈی ابرار احمد خان، صدر ایپسما راولپنڈی ڈویژن ابرار احمد ایڈووکیٹ، سیکرٹری جنرل عامر انور، ضلعی صدر آغا شہاب مقصود، صدر راولپنڈی ڈویژن خواتین ونگ سکینہ تاج، تحصیل صدر عدنان نثار، سیکرٹری جنرل راجہ نعمان قمر، سینئر نائب صدر راولپنڈی ڈویژن ڈاکٹر اعجاز محمود، سینئر نائب صدر راولپنڈی ڈویژن خواتین ونگ مسز لبنی رشید، تحصیل صدر خواتین ونگ مسز اسما شاہد اور دیگر عہدیداران نے شرکت کی۔ایپسما کی قیادت نے اس عزم کا اعادہ کیا کہ نجی تعلیمی ادارے حکومت پنجاب کے مثبت تعلیمی و کھیلوں کے اقدامات میں اپنا بھرپور کردار ادا کرتے ہوئے نوجوان نسل کو صحت مند، فعال اور باصلاحیت بنانے کے لیے ہر ممکن تعاون فراہم کریں گے۔
