محکمہ اوقاف و مذہبی امور پنجاب کے شعبہ فنانس میں مالیاتی نظم و ضبط

لاہور (خبر نگار) محکمہ اوقاف و مذہبی امور پنجاب کے شعبہ فنانس میں مالیاتی نظم و ضبط، شفافیت اور جواب دہی کے فروغ کے لیے ڈائریکٹر فنانس الوینا فیض کی زیرنگرانی اصلاحاتی اقدامات قابلِ توجہ قرار دیئے جا رہے ہیں۔ آڈٹ افسران کے دو اہم اجلاسوں کا انعقاد، ایڈمنسٹریٹرز کے ساتھ مسلسل رابطے، سرکاری واجبات کی وصولی پر توجہ اور مالیاتی رپورٹس سیکرٹری اوقاف کو پیش کرنے کا عمل اس امر کی عکاسی کرتا ہے کہ محکمانہ مالیاتی امور کی نگرانی کو محض رسمی کارروائی کے بجائے عملی بنیادوں پر موثر بنانے کی کوشش کی جا رہی ہیں۔ محکمانہ حلقوں کے مطابق ڈائریکٹر فنانس الوینا فیض نے آڈٹ افسران اور انتظامی افسران کے ساتھ رابطوں کو موثر بناتے ہوئے مالیاتی معاملات کی جانچ پڑتال، ریکارڈ کی درستگی اور قواعد پر عملدرآمد کو خصوصی اہمیت دی ہے۔ ان کی زیرنگرانی منعقد ہونے والے اجلاسوں اور رپورٹس کی تیاری سے مالیاتی امور کو اعلیٰ حکام کے سامنے لانے اور بروقت فیصلوں کے لیے ضروری معلومات فراہم کرنے میں مدد مل رہی ہے۔ الوینا فیض کی کارکردگی کا مثبت پہلو یہ ہے کہ مالیاتی نظم و ضبط کو صرف دفتری ہدایات تک محدود رکھنے کے بجائے آڈٹ، مانیٹرنگ اور جواب دہی کے نظام سے جوڑنے پر توجہ دی جا رہی ہے۔ سرکاری اداروں میں ایسی انتظامی سنجیدگی اس لیے بھی اہم ہے کہ مالیاتی ریکارڈ کی مسلسل جانچ پڑتال سے خامیوں کی نشاندہی اور ان کے تدارک کی راہ ہموار ہوتی ہے۔ سابق منیجر قصور اور سابق منیجر اوکاڑہ سے متعلق معاملات میں چیف سیکرٹری پنجاب کی جانب سے اپیلیں مسترد ہونے اور متعلقہ کارروائی کی پیروی کو محکمانہ احتساب کے حوالے سے اہم پیشرفت قرار دیا جا رہا ہے۔ ان معاملات میں قانونی تقاضوں کے مطابق کارروائی آگے بڑھانا اس اصول کو تقویت دیتا ہے کہ سرکاری ذمہ داریوں اور مالیاتی معاملات کا فیصلہ ذاتی پسند و ناپسند کے بجائے ریکارڈ، شواہد اور قانون کی بنیاد پر ہونا چاہیے۔ پنجاب بھر کے درباروں اور مزارات پر کیش کلیکشن کے نظام کو شفاف بنانے کے لیے نگرانی بڑھانے اور مختلف مقامات پر اضافی کیمرے نصب کیے جانے کی اطلاعات بھی سامنے آئی ہیں۔ ڈائریکٹر فنانس کی جانب سے مالیاتی نظم و ضبط پر توجہ کے تناظر میں یہ اقدامات سرکاری آمدن کے تحفظ اور وصولیوں کے نظام کو مزید قابلِ نگرانی بنانے کی اہمیت اجاگر کرتے ہیں۔ تاہم اصل کامیابی اس وقت سامنے آئے گی جب وصولیوں، بینک میں جمع ہونے والی رقوم اور آڈٹ ریکارڈ کے درمیان مکمل مطابقت یقینی بنائی جائے گی۔ ملتان سرکل نمبر2 میں مبینہ مالی بے ضابطگیوں پر پیڈا ایکٹ کے تحت کارروائی شروع کیے جانے کی اطلاع ہے، جبکہ جہانگیر احمد کو انکوائری آفیسر نامزد کیا گیا ہے۔ انکوائری کے ذریعے حقائق سامنے لانا اور ذمہ داری کا تعین شواہد کی بنیاد پر کرنا ضروری ہے۔ اگر کسی افسر یا اہلکار کے خلاف الزامات ثابت ہوتے ہیں تو قانون کے مطابق کارروائی محکمانہ احتساب کو موثر بنانے میں اہم کردار ادا کرے گی۔ ڈائریکٹر فنانس الوینا فیض کے مطابق محکمہ اوقاف میں کرپشن اور مالیاتی بے ضابطگیوں کی کوئی گنجائش نہیں، جبکہ کسی بھی افسر یا اہلکار کے خلاف کارروائی عہدے یا اثرو رسوخ کے بجائے شواہد اور قانون کے مطابق ہونی چاہیے۔ ان کا یہ موقف سرکاری اداروں میں غیر جانب دارانہ احتساب اور مالیاتی نظم و ضبط کے بنیادی اصولوں سے مطابقت رکھتا ہے۔