کراچی’ٹریفک حادثات، 3افراد جاں بحق، 3 زخمی، مشتعل افراد نے ٹریلر جلا دیا

کراچی(این این آئی) شہر قائد کے مختلف علاقوں میں ٹریفک حادثات کے نتیجے میں 3 افراد جاں بحق جبکہ 3 زخمی ہوگئے، کورنگی میں ٹریلر کی ٹکر سے موٹر سائیکل سوار کی ہلاکت کے بعد مشتعل افراد نے ٹریلر کو آگ لگا دی، جبکہ نارتھ ناظم آباد شادمان ٹاؤن میں تیز رفتار کار گرین لائن بس اسٹاپ کی حفاظتی جالیوں سے ٹکرا گئی۔ریسکیو حکام کے مطابق کورنگی میں جام صادق پل پر ٹریلر کی ٹکر سے موٹر سائیکل سوار 40 سالہ وقار ولد مسکین جاں بحق ہوگیا جبکہ اس کی 35 سالہ اہلیہ شدید زخمی ہوگئی۔ حادثے کے بعد مشتعل افراد نے ٹریلر کو آگ لگا دی، جس پر فائر بریگیڈ کی گاڑی نے قابو پایا۔ جاں بحق شخص کی لاش اور زخمی خاتون کو جناح اسپتال منتقل کردیا گیا، جبکہ پولیس نے واقعے کی تحقیقات شروع کردی ہیں۔دوسری جانب نارتھ ناظم آباد کے علاقے شادمان نمبر 2 میں تیز رفتار کار گرین لائن بس اسٹاپ کی حفاظتی جالیوں سے ٹکرا گئی، حادثے میں کار سوار 24 سالہ اکرم جاں بحق جبکہ 17 سالہ عبداللہ زخمی ہوگیا۔