لاہور (این این آئی) شہر کے مختلف علاقوں میں گیس پریشر کم ہونے کے باعث گھریلو صارفین کی جانب سے گیس کمپریسر کے استعمال میں اضافے کے بعد سوئی ناردرن گیس کمپنی نے کمپریسر استعمال کرنے والوں کے خلاف کریک ڈائون کا فیصلہ کر لیا۔ ذرائع کے مطابق کارروائی کے لیے خصوصی ٹیمیں تشکیل دے دی گئی ہیں جو کھانا پکانے کے اوقات میں مختلف علاقوں میں آپریشن کریں گی۔کریک ڈائون کے دوران کمپریسر استعمال کرتے ہوئے پکڑے جانے والے صارفین کے گیس کنکشن منقطع کر دیئے جائیں گے اور انہیں 7 روز تک بحال نہیں کیا جائے گا۔ ذرائع کا کہنا ہے کہ سات روز بعد صارفین سے حلف نامہ لینے کے بعد کنکشن بحال کیا جائے گا تاہم دوبارہ کمپریسر استعمال کرنے کی صورت میں 3 ماہ کے لیے گیس کنکشن منقطع کر دیا جائے گا۔ سوئی ناردرن گیس کمپنی کے مطابق کمپریسر کا استعمال پورے علاقے میں گیس پریشر متاثر کرتا ہے، اس لیے اس غیر قانونی عمل کے خلاف سخت کارروائی کی جائے گی۔
