مریدکے ، دو ماہ سے لاپتہ پانچ سالہ عون عباس کی لاش جوہڑ سے برآمد، دو ملزمان گرفتار

کالا شاہ کاکو (این این آئی) مریدکے دو ماہ سے لاپتہ پانچ سالہ عون عباس کے اغواء اور قتل کے مقدمے میں کرائم کنٹرول ڈیپارٹمنٹ (سی سی ڈی) اور مریدکے پولیس نے مشترکہ کارروائی کرتے ہوئے گائوں کے دو افراد، منیب اور آصف، کو گرفتار کرلیا ہے پولیس کے مطابق ملزمان کی نشاندہی پر جوہڑ سے بچے کی لاش برآمد کرکے پوسٹمارٹم کے لیے ہسپتال منتقل کر دی گئی، پولیس اور سی سی ڈی کی ابتدائی تفتیش کے مطابق ملزمان نے مبینہ طور پر عون کے والد کو ملنے والی انشورنس کی رقم کے لالچ میں بچے کو گھر کے باہر سے اغواء کیا اور بعدازاں قتل کرکے لاش گائوں کے قریب جوہڑ میں پھینک دی حکام کا کہنا ہے کہ ملزمان کا سراغ جدید سائنسی طریقوں اور موبائل ڈیٹا کی مدد سے لگایا گیا عون عباس پانچ بہنوں کا اکلوتا بھائی تھا۔ پولیس کے مطابق واقعے کی مزید تفتیش جاری ہے۔