اکثریت نہ ملنے پر نیتن یاہو بوکھلا گیا عرب جماعتوں پر دھاندلی کا الزام

تل ابیب( مانیٹرنگ ڈیسک) اسرائیل میں عام انتخابات کے ابتدائی نتائج میں نیتن یاہو اتحاد کو
برتری حاصل ہے، تاہم وہ حکومت بنانے کے لیے درکار پارلیمانی اکثریت حاصل کرنے کی پوزیشن میں نہیں ہے۔اسرائیلی میڈیا کے مطابق انتخابات میں ووٹوں کی گنتی جاری ہے اور اب تک 27لاکھ سے زائد ووٹوں، یعنی مجموعی ووٹوں کے تقریباً 57فیصد کی گنتی مکمل ہو چکی ہے۔ابتدائی نتائج کے مطابق نیتن یاہو اتحاد کو 56نشستوں پر برتری حاصل ہے، جبکہ اپوزیشن کے آئزن کوٹ اتحاد کو 49نشستوں پر برتری حاصل ہے۔رپورٹ کے مطابق نیتن یاہو کی جماعت اتحاد سے الگ 28نشستوں پر آگے ہے، جبکہ اپوزیشن کی جماعت یاشر اکیلے 21نشستوں پر برتری رکھتی ہے۔ اسرائیلی عرب جماعتیں بھی اب تک 15نشستوں پر آگے ہیں۔اسرائیلی پارلیمان، کنیسٹ میں حکومت بنانے کے لیے 120میں سے کم از کم 61 نشستیں درکار ہیں، تاہم ابتدائی نتائج کے مطابق نیتن یاہو اتحاد اور آئزن کوٹ اتحاد دونوں ہی مطلوبہ اکثریت سے پیچھے ہیں۔واضح رہے کہ یہ نتائج ووٹوں کی جاری گنتی پر مبنی ہیں اور حتمی نتائج سامنے آنے کے بعد نشستوں کی تعداد میں تبدیلی ممکن ہے۔ اسرائیلی وزیرِاعظم بن یامین نیتن یاہو کی جماعت لیکوڈ اور ان کا انتخابی اتحاد اتنی اکثریت حاسل نہ کرسکا کہ اپنی حکومت بنا سکیں۔اسرائیلی اخبار ٹائمز آف اسرائیل کے مطابق حکمراں جماعت لیکوڈ نے دعویٰ کیا کہ عرب جماعتوں نے رشوت، دھمکیوں، تشدد، جعل سازی اور غیر قانونی سافٹ ویئر کے ذریعے ووٹروں کو متحرک کرنے سمیت سنگین جرائم کا ارتکاب کیا۔رپورٹ کے مطابق عرب قیادت والی جماعتوں رعام وغیرہ نے انتخابات میں ریکارڈ ووٹ حاصل کیے ہیں اور ابتدائی اندازوں میں انھیں پارلیمان کی تاریخ میں اپنی سب سے زیادہ یعنی مجموعی طور پر 19 نشستیں ملنے کی توقع ہے۔ان نشستوں کے باعث نیتن یاہو کے سیاسی اتحاد اور ان کی مخالفت کرنے والی یہودی جماعتوں کے لیے پارلیمان میں واضح اکثریت حاصل کرنا مشکل دکھائی دیتا ہے۔اسرائیلی وزیراعظم نیتن یاہو کی جماعت لیکوڈ نے دعویٰ کیا کہ اس کے پاس مبینہ دھاندلی کے حوالے سے سیکڑوں بیانات اور دیگر شواہد موجود ہیں۔لیکوڈ جماعت نے نقد رقم اور رعام کے انتخابی پرچوں والے ہزاروں لفافوں، انتخابی عملے کو دھمکانے، ایک سے زیادہ مرتبہ ووٹ ڈالنے اور ووٹروں کی تعداد اور بیلٹ لفافوں کے ریکارڈ میں فرق جیسے الزامات بھی عائد کیے۔حکمراں جماعت نے پولیس، داخلی سلامتی کے ادارے اور مرکزی انتخابی کمیٹی سے فوری اور جامع تحقیقات کا مطالبہ کیا ہے۔دوسری جانب مرکزی انتخابی کمیٹی کے ایک عہدیدار نے چینل 12 کو انٹرویو دیتے ہوئے انتخابات میں دھاندلی کے دعووں کو مسترد کردیا۔
نیتن یاہو