کشمیری عوام کے حقِ خودارادیت کی حمایت اور اقلیتوں کے حقوق کے تحفظ کیلئے پْرعزم ہیں، سینیٹر نیلوفر بختیار

اسلام آباد(این این آئی)پاکستان مسلم لیگ کے زیرِ اہتمام یومِ استحصالِ کشمیر کے حوالے سے کشمیری عوام سے اظہارِ یکجہتی اور پارٹی کے اقلیتی ونگ کے مرکزی رہنما مکھیا عالم چند کے اعزاز میں استقبالیہ تقریب منعقد ہوئی۔ مسلم لیگ ہاؤس اسلام آباد میں مرکزی سیکرٹری اطلاعات غلام مصطفی ملک کی جانب سے منعقدہ تقریب کی صدارت پاکستان مسلم لیگ کے ایڈیشنل سیکرٹری جنرل ڈاکٹر محمد رحیم اعوان نے کی۔مہمانِ خصوصی سابق وفاقی وزیر سینیٹر نیلوفر بختیار تھیں، تقریب کی تھیں۔تقریب سے خطاب کرتے ہوئے سینیٹر نیلوفر بختیار نے کہا کہ پاکستان کشمیری عوام کے حقِ خودارادیت کی حمایت اور اقلیتوں کے حقوق کے تحفظ کے لیے پْرعزم ہے۔ عالمی برادری کو چاہیے کہ وہ کشمیری عوام کو ان کا بنیادی حق دلانے اور اقلیتوں کے حقوق کے تحفظ کے لیے اپنا مؤثر کردار ادا کرے۔پاکستان مسلم لیگ کے مرکزی سیکرٹری اطلاعات غلام مصطفیٰ ملک نے کہا کہ پاکستان میں اقلیتوں کو مکمل مذہبی آزادی حاصل ہے، جبکہ کشمیر پر بھارت کا غاصبانہ قبضہ کسی صورت قابلِ قبول نہیں۔ انہوں نے کہا کہ 5 اگست 2019 کے بھارتی اقدامات کشمیری عوام کے حقوق پر ضرب ہیں۔ اقوام متحدہ اور عالمی برادری کو چاہیے کہ وہ اپنی قراردادوں کے مطابق مسئلہ کشمیر کے حل اور کشمیری عوام کو حقِ خودارادیت دلانے کے لیے عملی اقدامات کریں۔