اسلام آباد (این این آئی)وفاقی وزیر برائے اقتصادی امور و اسٹیبلشمنٹ ڈویژن سینیٹر احد چیمہ نے کہاہے کہ
تعمیراتی شعبے کو مضبوط بنانے کے لیے حکومت اصلاحات لا رہی ہے۔وفاقی وزیر نے تعمیراتی شعبے کو مضبوط بنانے، منصوبوں پر عمل درآمد بہتر کرنے اور صنعت کو درپیش اہم مسائل کے حل کے لیے اصلاحات پر غور کرنے کے سلسلے میں ایک اجلاس کی صدارت کی۔اجلاس میں مجوزہ کنسٹرکشن انڈسٹری ڈیولپمنٹ اتھارٹی بل پر تبادلہ خیال کیا گیا۔ وفاقی وزیر احد چیمہ نے کہا کہ بل پر تفصیلی غور ضروری ہے جس میں یہ طے کیا جائے کہ تعمیراتی شعبے کے لیے ایک ہی ادارہ قائم کیا جائے یا دو الگ ادارے بنائے جائیں،ایک شعبے کی نگرانی کے لیے اور دوسرا تعمیراتی صنعت کے فروغ اور متعلقہ امور کے لیے۔ انہوں نے متعلقہ حکام، وزیرِ مملکت برائے خزانہ بلال اظہر کیانی اور کنسٹرکٹرز ایسوسی ایشن آف پاکستان (کیپ) کے نمائندوں سے مجوزہ ادارہ جاتی ڈھانچے پر مزید مشاورت کرنے کو کہا۔نقائص کی ذمہ داری کی مدت کے دوران ٹھیکیداروں کی جمع شدہ رقم پر بھی بات ہوئی۔ اجلاس میں تجویز زیرِ غور آئی کہ یہ رقوم ایسے کھاتوں میں رکھی جائیں جن پر منافع حاصل ہو، اور مقررہ مدت پوری ہونے پر اصل رقم کے ساتھ منافع بھی ٹھیکیداروں کو واپس کیا جائے۔ وزیرِ اقتصادی امور نے قابلِ عمل طریقہ کار وضع کرنے کے لیے مزید مشاورت پر زور دیا۔
