لیسکو کا بجلی چوروں کے سہولت کار افسران و ملازمین کیخلاف مقدمات درج کرنیکا فیصلہ

لاہور (این این آئی) لاہور الیکٹرک سپلائی کمپنی (لیسکو) نے بجلی چوروں کی سہولت کاری میں ملوث افسران و ملازمین کے گرد شکنجہ سخت کرتے ہوئے ان کے خلاف مقدمات درج کرانے کا فیصلہ کر لیا۔ ذرائع کے مطابق بجلی چوری کروانے میں ملوث افسران و ملازمین کے خلاف قانونی کارروائی بھی ہو گی جبکہ منظور شدہ لوڈ کے مطابق ذمہ دار میٹر انسپکٹرز کے خلاف بھی مقدمہ درج ہوں گے۔ ذرائع کے مطابق لیسکو نے میٹر ریڈنگ لینے والے میٹر ریڈرز کے خلاف مقدمات درج کروانا شروع کر دیئے ہیں۔ اس کے علاوہ کسی بھی علاقے میں بجلی چوری ہونے پر متعلقہ فیڈر انچارج ،لائن سٹاف کے خلاف قانو نی کاروائی عمل میں لائی جا ئے گی۔ ذرائع کا کہنا ہے کہ بجلی چوری کی روک تھام کے لئے افسران و ملازمین کے خلاف مقدمات درج کروانے کا فیصلہ کیا گیا ہے۔ اس سے قبل لیسکو کی جانب سے بجلی چوری میں ملوث صارفین کے خلاف مقدمات درج ہو رہے ہیں،صارفین کو پکڑ کر بجلی چوری کرنے پر ڈی ٹیکشن بل بھی چارج کیا جا رہا ہے۔