راولپنڈی(خصوصی رپورٹر)پاکستان ریلویز راولپنڈی ڈویژن میں ڈویژنل سپرنٹنڈنٹ نور
الدین داوڑ نے ریلوے ریزرویشن آفس راولپنڈی کے مشہور ہراسمنٹ کیس میں ملوث سابق سپروائزر امتیاز کو دوبارہ سپروائزر تعینات کر دیا ہے۔ گزشتہ سال خواتین کی جانب سے مسلسل انہیں ہراساں کرنے کی شکایات موصول ہوئی تھیں جس پر ریلوے پولیس کی ڈی ایس پی نائلہ اشرف نے انکوائری کرتے ہوئے امتیاز کیخلاف اندراج مقدمہ کی سفارش کی تھی مگر اس موقع پر بھی ڈویژنل سپرنٹنڈنٹ نور الدین داوڑ نے معاملہ کو اپنے ہاتھوں میں لیتے ہوئے فوری طور پر ڈپٹی ڈی ایس کی سربراہی میں 3 رکنی کمیٹی بنائی تھی جس میں ایک خاتون آفیسر کو بھی شامل کیا گیا تھا۔کمیٹی کی رپورٹ کی روشنی میں سپروائزر امتیاز سمیت متاثرہ خواتین کو مختلف جگہوں پر تعینات کر دیا گیا تھا۔ اب ڈویژنل سپرنٹنڈنٹ پاکستان ریلویز نور الدین داوڑ نے ایک بار پھر ملک امتیاز کو ریلوے ریزرویشن آفس راولپنڈی میں سپروائزر تعینات کر دیا ہے۔ واضح رہے کہ سابق دور میں ریزرویشن اسٹاف کی جانب سے امتیاز پر نہ صرف خواتین اسٹاف کو ہراساں کرنے کے الزامات سامنے آتے رہے ہیں بلکہ ریلوے کے مختلف کوٹہ جات کی ٹکٹیں بھی بلیک میں فروخت کرنے جیسے سنگین الزامات لگتے رہے ہیں۔ ریلوے ملازمین نے مطالبہ کیا ہے کہ ڈی ایس کے اس سنگین اقدام کا نوٹس لے کر ایسے جنسی درندے کو کسی بھی اہم ذمہ داری سے ہٹایا جائے تاکہ ماتحت عملہ کی خواتین کی عزت محفوظ رہ سکے۔خواتین ملازمین نے فیلڈ مارشل وآرمی چیف عاصم منیر سے نوٹس لینے کا مطالبہ کیا ہے،
