اکتوبر 66 برسوں کے دوران ملک کا چھٹا گرم ترین مہینہ قرار لاہور پھر دنیا کا آلودہ شہر

کراچی، لاہور (نیوز ایجنسیاں) اکتوبر 2026کو گزشتہ 66سال کے دوران ملک کا چھٹا
گرم ترین اکتوبر قرار دے دیا گیا، گزشتہ ماہ ملک کا اوسط درجہ حرارت 25.2ڈگری سینٹی گریڈ ریکارڈ کیا گیا۔ادھر صوبائی دارالحکومت لاہور ایک بار پھر دنیا کا آلودہ ترین شہر رہا۔ محکمہ موسمیات نے اکتوبر 2026کی ماہانہ موسمیاتی رپورٹ جاری کر دی جس کے مطابق اکتوبر 2026میں ملک کا اوسط درجہ حرارت معمول سے 1.2 ڈگری سینٹی گریڈ زیادہ ریکارڈ کیا گیا۔اکتوبر میں رات کا اوسط درجہ حرارت معمول سے 2.3ڈگری سینٹی گریڈ زیادہ رہا، جس کے باعث گزشتہ 66سال میں اکتوبر 2026تیسری گرم ترین راتوں والا مہینہ رہا۔ اکتوبر میں دن کا اوسط زیادہ سے زیادہ درجہ حرارت 32.1 ڈگری سینٹی گریڈ ریکارڈ کیا گیا۔محکمہ موسمیات کے مطابق اکتوبر کے دوران ملک میں اوسط بارش 9.2 ملی میٹر ریکارڈ کی گئی۔بلوچستان کا ضلع تربت ملک کا گرم ترین مقام رہا، جہاں درجہ حرارت 44 ڈگری سینٹی گریڈ ریکارڈ کیا گیا جبکہ سندھ کا شہر مٹھی اکتوبر کے دوران گرم ترین مقام رہا، جہاں اوسط زیادہ سے زیادہ درجہ حرارت 39 ڈگری سینٹی گریڈ ریکارڈ ہوا۔گلگت بلتستان کا شہر اسکردو اکتوبر میں ملک کا سرد ترین مقام رہا، جہاں اوسط کم سے کم درجہ حرارت 6.2 ڈگری سینٹی گریڈ ریکارڈ کیا جبکہ اکتوبر کی سرد ترین رات درجہ حرارت منفی 1.2 ڈگری سینٹی گریڈ ریکارڈ کی گئی۔پنجاب کے علاقے نورپور تھل میں اکتوبر کی سب سے زیادہ یومیہ بارش 48 ملی میٹر ریکارڈ کی گئی جبکہ پشاور اکتوبر کے دوران ملک کا سب سے زیادہ بارش والا شہر رہا، جہاں مجموعی بارش 96.1 ملی میٹر ریکارڈ کی گئی۔واضح رہے کہ ملک میں النینو کی صورتحال برقرار ہے اور بحرالکاہل میں سمندری سطح کا درجہ حرارت معمول سے 2.8 ڈگری سینٹی گریڈ زیادہ ہے۔محکمہ موسمیات کے مطابق بحر ہند میں انڈین اوشین ڈائی پول مثبت مرحلے میں داخل ہوگیا ہے۔دریں اثناء صوبائی دارالحکومت لاہور ایک دن کے وقفے کے بعد دوبارہ آلودہ ترین شہروں کی فہرست میں پہلے نمبر پر آ گیا ۔لاہور میںایئر کوالٹی انڈیکس کی سطح 362 تک پہنچ گئی۔مختلف علاقوں میں فضائی آلودگی کی صورتحال کے مطابق اقبال ٹائون میں سب سے زیادہ اے کیو آئی لیول 722 ریکارڈ کیا گیا، جبکہ برکی روڈ پر 455، ماڈل ٹائون میں 362، بیدیاں روڈ پر 264اور ڈی ایچ اے فیز 5میں اے کیو آئی لیول 282 ریکارڈ کیا گیا۔علاوہ ازیں پنجاب کے مختلف شہروں میں سموگ اور فضائی آلودگی کی صورتحال انتہائی تشویشناک حد تک پہنچ گئی ہے، جس کے باعث فضا شدید مضر صحت ہو چکی ہے۔تازہ ترین اعداد و شمار میں بتایا گیا جھنگ میں ایئر کوالٹی انڈیکس(اے کیو آئی ) 678، ملتان میں 658اور گوجرانوالہ میں 519ریکارڈ کیا گیا ہے۔ جبکہ لاہور میں پارٹیکیولیٹ میٹرز کی تعداد 400 اور فیصل آباد میں 366 تک پہنچ گئی ہے۔طبی ماہرین نے شدید آلودگی کے مدنظر شہریوں کو غیر ضروری سفر سے گریز کرنے، باہر نکلتے وقت لازمی ماسک کا استعمال کرنے اور دیگر احتیاطی تدابیر اختیار کرنے کی سخت ہدایت کی ہے۔
اکتوبر