گوجرخان شہر میں صفائی کا ناقص نظام،ڈینگی لاروا کی افزائش کا خدشہ

گوجرخان (بیورو رپورٹ)گوجرخان شہر میں صفائی ستھرائی کا نظام شہریوں کے لیے پریشانی کا باعث بن گیا، اندرون شہر گلی محلے کوڑے کرکٹ کے ڈھیروں سے بھرے پڑے ہیں جبکہ نالوں کی صفائی نہ ہونے کے باعث مچھروں اور ڈینگی لاروا کی افزائش کا خدشہ بڑھنے لگا ہے۔ شہریوں کے مطابق صفائی کا عمل زیادہ تر جی ٹی روڈ اور سروس روڈ کے اطراف تک محدود دکھائی دیتا ہے جبکہ اندرون شہر کے رہائشی علاقوں میں صفائی کی صورتحال ابتر ہے۔ متعدد بار شکایات اور مطالبات کے باوجود مسائل حل نہ ہونے پر شہریوں نے تشویش کا اظہار کیا ہے۔ دوسری جانب شہر کے مختلف گلی محلوں میں اسٹریٹ لائٹس خراب ہونے کے باعث رات کے وقت تاریکی چھائی رہتی ہے، جس سے راہگیروں کو آمدورفت میں مشکلات کا سامنا کرنا پڑتا ہے۔ عوامی حلقوں نے اسسٹنٹ کمشنر گوجرخان اور متعلقہ بلدیاتی حکام سے مطالبہ کیا ہے کہ اندرون شہر صفائی کا مثر انتظام کیا جائے، نالوں کی فوری صفائی اور ڈینگی لاروا کے خاتمے کے لیے اقدامات کیے جائیں جبکہ خراب اسٹریٹ لائٹس کی مرمت کرکے شہریوں کو بنیادی سہولیات فراہم کی جائیں۔